Saturday 25 January 2020
Home      All news      Contact us      English
tert.am - 2 month ago

Տակեո Կանադեն ՎիվաՍել-ՄՏՍ-ում հանդիպել է ՏՀՏ հայաստանյան համայնքի ներկայացուցիչների հետ

ՏՏ ոլորտում համաշխարհային ներդրման համար ՀՀ պետական մրցանակի դափնեկիր, Origami World տեսության հիմնադիր, վիրտուալ իրականություն հասկացության հեղինակ, Կարնեգի Մելոն համալսարանի ճապոնացի պրոֆեսոր Տակեո Կանադեն այցելել է ՎիվաՍել-ՄՏՍ-ի գլխամասային գրասենյակ:

Տեղի ունեցած մամուլի ասուլիսի ընթացքում լրատվամիջոցների հարցերին են պատասխանել դոկտոր Կանադեն, ՎիվաՍել-ՄՏՍ-ի գլխավոր տնօրեն, մրցանակաբաշխության հանձնաժողովի անդամ Ռալֆ Յիրիկյանը, ՀՀ բարձր տեխնոլոգիական արդյունաբերության նախարարի տեղակալ Արմեն Աբրոյանը, Սինոփսիս Արմենիա ընկերության գործադիր տնօրեն, մրցանակաբաշխության աշխատանքները համակարգող Հովիկ Մուսայելյանը և Ճապոնիայում ՀՀ արտակարգ և լիազոր դեսպան Հրանտ Պողոսյանը:

Իր ուղերձում պարոն Կանադեն շնորհակալություն է հայտնել ՀՀ պետական մրցանակին արժանանալու համար և նշել, որ այն իր համար անչափ ոգևորիչ առիթ է շարունակելու իր առաքելությունը: Ունենալով հստակ տեսլական՝ Կանադեն չի դադարում ոգևորել երիտասարդներին, ովքեր իրենց առաջին քայլերն են կատարում ռոբոտաշինության ոլորտում: Նրա խոսքով՝ ռոբոտաշինությունը գիտության այն ճյուղերից է, որոնք չունեն սահմաններ. այն ամեն անգամ նոր հորիզոններ բացելու և մարդ-ռոբոտ փոխազդեցությունն ու դրա նշանակությունը մեր առօրյա կյանքում ավելի խորը հասկանալու հնարավորությունների ոլորտ է:

Ինձ համար մեծ պատիվ է դառնալ ՏՏ ոլորտում համաշխարհային ներդրման համար ՀՀ պետական մրցանակի 2019թ. դափնեկիր: Ես լսել եմ, որ Հայաստանում բարձր տեխնոլոգիաների ոլորտն ավելին է, քան պարզապես կարգախոս: Սա շատ ողջունելի է, և պատվաբեր է նման երկրի կողմից այսպիսի մրցանակի արժանանալը ,- ընդգծել է դոկտոր Տակեո Կանադեն:

Խթանելով բարձր տեխնոլոգիաների ոլորտի զարգացումը Հայաստանում՝ ՎիվաՍել-ՄՏՍ-ի համար իսկապես մեծ պատիվ է լինել այս նախաձեռնության կողքին արդեն տասը տարի, քանի որ տարեցտարի ավելանում է այն դրական ազդեցությունը, որն ունենում է այս մրցանակը մեր երկրի համար: Հայաստանը շարունակում է բարձրացնել իր վարկանիշը՝ որպես ՏՀՏ ոլորտում զարգացման նշանակալի հեռանկար ունեցող երկիր: Կարծում եմ, որ նման լեգենդների մուտքը մեր երկիր ավելի է ոգևորում մեր երիտասարդներին իրենց նեղ մասնագիտական կողմնորոշման հարցում ,- ասել է ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը:

Պարոն Կանադեն Կարնեգի-Մելոն համալսարանի դասախոս է, ով վիրտուալ իրականության հասկացության հայտնագործողն ու ներդնողն է: Շատ կարևոր է նման մարդկանց ներդրումները համաշխարհային ոլորտում: Ուզում եմ ընդգծել այս մրցանակաբաշխության կարևորության մասին, որը Հայաստանին թույլ է տալիս հանդես գալ որպես տարածաշրջանային կենտրոն ,-նշել է ՀՀ բարձր տեխնոլոգիական արդյունաբերության նախարարի տեղակալ Արմեն Աբրոյանը:

Այս տարի լրացավ մրցանակաբաշխության 10 տարին: Մենք հպարտ ենք, որ այս նախաձեռնությունը, որի գաղափարին թերահավատորեն էին վերաբերվում, ապացուցեց իր լինելու իրավունքը: Պատահական չէ, որ Հայաստանը պետական մրցանակ է շնորհում համաշխարհային ներդրումների համար։ Ներդրումներ, որոնք փոխել են մարդկության կյանքի ընթացքը։ Եվ մենք հպարտ ենք, որ համաշխարհային լեգենդները ամեն տարի այցելելով Հայաստան բարձրացնում են մեր երկրի վարկանիշը ու ճանաչողությունը , - ասել է մրցանակաբաշխության կոմիտեի աշխատանքները համակարգող Հովիկ Մուսայելյանը:

Կոնքոսկրի փոխարինման համար համակարգչային վիրաբուժական համակարգերին, դեմքի ճանաչման, ինչպես նաև եռաչափ տեսագրման տեխնոլոգիաներին նվիրված աշխատանքների շնորհիվ Կանադեն դարձել է ռոբոտաշինության ոլորտի առաջատար մասնագետներից մեկն աշխարհում: 2008թ.-ին դոկտոր Կանադեն արժանացել է Բաուերի, ինչպես նաև Գիտության ոլորտում ձեռքբերումների համար շնորհվող մրցանակներին:

Կանադեն նաև վիրտուալ իրականություն հասկացության հեղինակն է, համաձայն որի իրադարձությունների՝ տարբեր դիտանկյուններից վերցված մի քանի պատկերների համակցումը միահամակարգ մոդելի մեջ թույլ է տալիս միևնույն երևույթը տեսնել տարբեր տեսանկյուններից:

1989թ.-ին Կանադեն Կարնեգի Մելոն համալսարանում հիմնել է ռոբոտաշինության դոկտորական ծրագիրը, այնուհետև՝ մագիստրոսական ծրագիրը: Կանադեն համահեղինակ է մոտ 300 գիտական հրապարակումների և շուրջ 20 արտոնագրի:

Տակեո Կանադեն տասներորդն է ՏՏ ոլորտում համաշխարհային ներդրման համար ՀՀ մրցանակին արժանացածների շարքում:

Նախորդ տարիների մրցանակակիրներն են՝ Intel կորպորացիայի նախկին գլխավոր գործադիր տնօրեն Քրեյգ Բարրետը, Apple Computer կորպորացիայի համահիմնադիր Ստիվ Վոզնիակը, Synaptics ընկերության պատվավոր նախագահ, Ֆեդերիկո և Էլվիա Ֆաջին հիմնադրամի նախագահ Ֆեդերիկո Ֆաջինը, Hitachi ընկերության նախկին գործադիր տնօրեն Ցուգիո Մակիմոտոն, Cisco Systems զարգացման գծով նախագահ Մարիո Մացցոլան, Kaspersky Lab -ի գլխավոր տնօրեն Եվգենի Կասպերսկին, ինտերնետի նախահայրերից մեկը, Open-Root կազմակերպության գլխավոր տնօրեն Լուի Պուզենը, Nest Labs ընկերության հիմնադիր, IPod ապրանքանիշի ստեղծող Թոնի Ֆադելը և National Instruments ընկերության համահիմնադիր Ջեյմս Թրուշարդը։

2019թ.-ին ՎիվաՍել-ՄՏՍ-ի կողմից մրցանակաբաշխությանը տրամադրվել է 20 մլն. դրամ: Ընդհանուր առմամբ՝ այդ նպատակով 2010-2019 թթ. ընկերության կողմից ներդրվել է ավելի քան 200 մլն. դրամ:

ՎիվաՍել-ՄՏՍ-ը (ՄՏՍ Հայաստան ՓԲԸ) Հայաստանի շարժական կապի առաջատար օպերատորն է, որն ունի ամենաընդարձակ ցանցը և տրամադրում է ձայնային և տվյալների փոխանցման ծառայությունների բազմազան տեսականի Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից 2005թ. հուլիսի 1-ից, ՎիվաՍել-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: ՎիվաՍել-ՄՏՍ-ը նորարարությունների առաջատարն է և հետամուտ է ոլորտի բոլոր զարգացումներին ի շահ երկրի շարժական հեռահաղորդակցության շուկայի: ՎիվաՍել-ՄՏՍ-ն իր գործունեության մեջ առաջնորդվում է ISO 26000 (Սոցիալական պատասխանատվության միջազգային ստանդարտ) և ISO/IEC 27001:2013 (Տեղեկատվական անվտանգության կառավարման համակարգ) ստանդարտներով: Հավելյալ տեղեկություններ ստանալու համար այցելեք www.mts.am։

Մոբիլնիյե Տելեսիստեմի ՀԲԸ-ն (ՄՏՍ) Ռուսաստանում և ԱՊՀ երկրներում հեռահաղորդակցության խոշորագույն օպերատոր է: Դուստր ձեռնարկությունների հետ միասին կազմակերպությունը սպասարկում է ավելի քան 100 միլիոն բաժանորդի Ռուսաստանում, Հայաստանում, Բելառուսում և Ուկրաինայում: 2000թ-ի հուլիսից ՄՏՍ -ի բաժնետոմսերը գնանշված են Նյու Յորքի բորսայում MBT ծածկագրի տակ: Հավելյալ տեղեկություններ ստանալու համար այցելեք www.mtsgsm.com։




Related news

Latest News
Hashtags:   

Տակեո

 | 

Կանադեն

 | 

ՎիվաՍել

 | 

հանդիպել

 | 

հայաստանյան

 | 

համայնքի

 | 

ներկայացուցիչների

 | 
Most Popular (6 hours)

Most Popular (24 hours)

Most Popular (a week)

Sources