Երևանի 2020 թ. բյուջեի նախագծում որևէ աննախադեպ բան չկա. պարգևատրումային ֆոնդն աճում է 1.2 մլրդ դրամով, դեֆիցիտը 9 % է. Երևանի ավագանու անդամ (տեսանյութ)

Երևանի 2020 թվականի բյուջեի նախագծում որևէ աննախադեպ բան չկա: Աննախադեպ բառն ավելի շատ շոու ծրագրերին է բնորոշ: Այս մասին Tert.am-ի հետ զրույցում ասաց Երևանի ավագանու Բարգավաճ Հայաստան խմբակցության քարտուղար Հռիփսիմե Առաքելյանը: Երևանի 2020 թվականի բյուջեի նախագծով հաջորդ տարի բյուջեն զգալի աճ է գրանցելու. 2019 թ. 83 մլրդ 200 միլիոնի մուտքերի փոխարեն նախատեսված է 107 մլրդ դրամի մուտք, իսկ 2020-ի ծախսային մասը կլինի 116 մլրդ դրամ 2019-ի շուրջ 91 մլրդ-ի փոխարեն: 2020 թ. բյուջեն 9 միլիարդ 112 միլիոն դրամի պակասուրդ է ունենալու: Պետք է հաշվի առնել, որ հունվարի 1-ից աշխատավարձերի որոշակի բարձրացում է տեղի ունեցել մանկավարժների, մանկապարտեզների աշխատակիցների, նաև առողջապահության ոլորտի աշխատակիցների համար: Եվ այս պատվիրակված լիազորությունների շրջանակում բնականաբար պետբյուջեից հատկացումներն են մեծացել: Ավելացված գումարը բյուջեի կոնկրետ վճարվելիք գումարներ են՝ աշխատավարձերի տեսքով, դու չես կարող այդ գումարով ասֆալտ անել կամ խողովակներ փոխել ,- նշեց Հռիփսիմե Առաքելյանը: Ավագանու անդամը նշում է, որ 2020 թ. համար քաղաքապետարանի աշխատակազմի պարգևավճարների ֆոնդը սահմանվել է 1 մլրդ 900 մլն դրամ՝ նախորդ տարվա 700 մլն դրամի փոխարեն: Ինչպես նաև ավտոպարկի սպասարկմանն ուղղվող գումարներն են մեծացրել: Վերջին մի քանի տարիների մոնիտորինգը ցույց է տալիս, որ այս բյուջեում դեֆիցիտի ամենամեծ թիվն է: Ամենաշատ դեֆիցիտը 250 մլն դրամի կարգի էր: Մինչև 3-4 տոկոս թույլատրելի է դեֆիցիտը, սակայն քաղաքային բյուջեում մոտ 9 տոկոսի դեֆիցիտ ունենք, սա մտածելու տեղիք տալիս է ,- ասաց նա: Պաշտոնավարման սկզբում քաղաքապետ Հայկ Մարությանը հայտարարել էր, որ կառավարման ապարատը արդյունավետ է աշխատում, աշխատակազմը ուռճացված է: Հռիփսիմե Առաքելյանի խոսքով՝ այս ընթացքում, սակայն, աշխատակազմն էլ ավելի է մեծացել: Այդ ուռճացված աշխատակազմը կազմում էր 1997 աշխատակից, և այս ընթացքում ոչ թե աշխատակազմը կրճատվել է, այլ Հայկ Մարությանի օրոք ավելի է մեծացվել: Այս պահին համայնքային աշխատողների թիվը 2032 է ,- նշեց նա: Հրատապ լուծում պահանջող ընթացիկ աշխատանքների իրականացում ծրագրով 2020 թ. համար նախատեսվել է 355,000.0 հազ. դրամ՝ 2019 թվականի ճշտված բյուջեից 325,000.0 հազ. դրամով ավել: Ես ուզում եմ հասկանալ՝ 30 մլն դրամի պարագայում ինչ ենք արել, ինչ նախադեպ ենք ունեցել, որ այսքան ավելացնում ենք: Ընդհանրապես այս բյուջեն որևէ կոնկրետ բան մեզ թույլ չի տալիս իմանալ: Փոխքաղաքապետին հարցնում եմ՝ ինչու բացվածքներ չեք տալիս, պատասխանում է՝ ինչպես եք պատկերացնում, ամեն հոդվածի տակ 300 էջանոց հավելվածը կցե՞նք: Ասում է՝ Ձեզ հետաքրքիր է, եկեք, հարցրեք ,- հայտնեց Հռիփսիմե Առաքելյանը: Ավագանու Բարգավաճ Հայաստան խմբակցության քարտուղարը նաև խնդիրներ է տեսնում Երևանի զարգացման 5-ամյա ծրագրում. Որևէ վերգետնյա կամ ստորգետնյա ավտոկայանատեղի կառուցելու մասին խոսք չկա: Ես սպասում էի, որ գոնե 2020 թ. նախագծային ինչ-որ մի բան կլինի, որովհետև այսօր քաղաքի թիվ 1 խնդիրներից մեկը ավտոկայանատեղիների և ավտոմոբիլներից բեռնաթափելու խնդիրն է : Ինչ վերաբերում է տրանսպորտային նոր ցանցի ներդրմանը, Հռիփսիմե Առաքելյանը նշեց, որ լուրջ գումարներ են անհրաժեշտ, տրանսպորտային նոր ցանցի համար կպահանջվի մոտ 150-200 մլն դոլար: Նախնական հաշվարկները կատարվել են, ներկայացվել են կառավարությանը: Ինչու կառավարությանը, որովհետև համայնքային բյուջեն թույլ չի տալիս տրանսպորտային ցանց փոխել, նաև քանի որ քաղաքապետը հակված է ամեն ինչ ներառել Երևանի քաղաքապետարանի ներքո, այսինքն, համայնքային դարձնել: Որոշել են, որ տրանսպորտը անպայման պետք է համայնքային լինի: Այս փուլում դեռ հստակ, ռեալ բան չկա, որ այսինչ ժամկետից տրանսպորտի խնդիրն սկսվելու է լուծվել ,- ասաց նա:

Read on the original site

Մեր այսօրվա հավաքը երեք հասցեատեր ունի. Արման Բաբաջանյան (տեսանյութ)