Tuesday 10 December 2019
Home      All news      Contact us      English
tert.am - 26 days ago

Նիկոլ Փաշինյանի շանտաժը. թիրախում կրկին ԲՀԿ-ն է

Կառավարության ներկայացրած Քրեական օրենսգրքում փոփոխությունների աղմկահարույց նախագիծը, որով քրեական ենթամշակույթ կրող խմբավորումների համար նոր կարգավորումներ են սահմանվում, քրեական աշխարհին հարելը քրեականացվում է, բավական լուրջ կրքեր է բորբոքել խորհրդարանում: ԱԺ ամբիոնից խոսելով հարցի շուրջ և պատասխանելով իմքայլական պատգամավորներից մեկի այն հարցին, թե արդյոք միայն այս իրավական կարգավորումները բավարա՞ր են քրեական ենթամշակույթն արմատախիլ անելու գործում՝ Նիկոլ Փաշինյանը հանդես է եկել սպառնալիքներով՝ գործի դնելով իրեն այնքա՜ն հոգեհարազատ բառապաշարը: Եթե կան մարդիկ, այդ թվում՝ քաղաքական գործիչներ, այդ թվում՝ պատգամավորներ, որոնք մտածում են, թե այս հարցում կոմպրոմիսներ են լինելու, և որոնք մտածում են, որ էս օրենքների հետ կապված ասենք, օրինակ, կարող են միջնորդավորված ձևով պատգամավորի սպառնալ, օրինակ՝ հարցի հարակից զեկուցողներին, ուղիղ ասում ենք՝ կպառկցնենք ասֆալտին, հանկարծ մտքներով չանցնի, կպառկցնենք ասֆալտին և կտանք պատերով՝ բառիս բուն իմաստով: Որևէ մեկը չփորձի, նախկին կլինի, ներկա կլինի, որ ասենք հանրապետության երկրորդ քաղաքի կեսը թալանել ա, հիմա մտածի, թե կարա թպրտա: Կտանք պատերով, կպառկցնենք ասֆալտին: Թո՛ղ ականջներին օղ անեն, եթե օղ չեն անի տեսարանները դուք կտեսնեք իրականության մեջ ,-մասնավորապես՝ հայտարարել է Փաշինյանը՝ միաժամանակ համոզմունք հայտնելով, որ քրեական ենթամշակույթի քարոզչությունը և հերոսացումը կոռուպցիայի ամենամեծ ուղեկիցներն են: Վերջին օրերին Ազգային ժողովում արշալույսները խաղաղ չեն: Մասնավորապես՝ իշխանությունների հետ բախման կետում է հայտնվել ԲՀԿ-ն, որը, հանդես գալով, մի կողմից, ավանդական արժեքների պաշտպանության դիրքերից (այս իմաստով հատկանշական են հատկապես Գագիկ Ծառուկյանի ու ԲՀԿ-ական Գևորգ Պետրոսյանի՝ երկակի մեկնաբանությունների տեղիք չտվող հայտարարությունները), մյուս կողմից՝ հստակ հարցադրումներ առաջադրելով իշխանություններին՝ կապված վերոհիշյալ նախագծի հետ, ակնհայտորեն սկսել է անհարմարություններ պատճառել իմքայլականներին՝ ստիպելով նրանց սեփական ծոծրակին զգալ խորհրդարանական ընդդիմության շունչը:

Նիկոլ Փաշինյանի խոսքերի բուն հասցեատերը, իհարկե, առաջին հերթին ԲՀԿ-ական Վարդան Ղուկասյանն է, ով նոյեմբերի 13-ին լրագրողների հետ զրույցում հանդես էր եկել մի կողմից՝ օրենքով գողերի պաշտպանությամբ՝ այդպիսով արտահայտելով իր կարծիքը կառավարության ներկայացրած նախագծի վերաբերյալ, մյուս կողմից՝ պաշպանել ընտանիքի մասին ավանդական պատկերացումներն ու արժեքները: Ուշագրավ է, որ Ղուկասյանը նաև քննադատական հայտարարություններով էր հանդես եկել՝ ուղղված իշխանական որոշ պատգամավորների դեմ, ինչպես նաև կողմ արտահայտվել ԿԳՄՍ նախարար Արայիկ Հարությունյանի հրաժարականի գաղափարին:

Այն, որ Փաշինյանը պետք է ընդդիմախոսեր իրեն ընդդիմախոսողներին ու փորձեր սեփական քաղաքական ուժի ունեցած տեսակետների պաշտպանության դիրքերից հանդես գալ, իհարկե, սպասելի էր: Ինչ-որ իմաստով անսպասելի էր, սակայն, այն կերպը, որով վարչապետը փորձել է հակադարձել ԲՀԿ-ականներին: Ասֆալտին փռելու , պատերին ծեփելու մասին Փաշինյանի՝ նախկինում արած հայտնի հայտարարությունները մեկ անգամ չէ, որ արժանացել են օբյեկտիվ քննադատության նախ՝ որովհետև նման բառամթերքի գործածումը մի ողջ երկիր ղեկավարող մարդու կողմից անընդունելի է՝ սկզբունքորեն, ապա՝ հարց է առաջանում, թե ինչո՞ւ է ասֆալտին փռելու,պատերին ծեփելու մասին վարչապետը հիշում միայն այն ժամանակ, երբ խոսքն առնչվում է սեփական թիմի կամ հենց իր քաղաքական շահերին: Եթե նա ինչ-որ բան գիտի ինչ-որ մեկի մասին կամ ունի այդ ինչ-որ մեկի հանցանքն ապացուցող փաստեր, ապա ինչո՞ւ է համապատասխան ինֆորմացիան որպես քաղաքական մահակ կիրառում մարդկանց դեմ ու վախեցնում: Դիցուք, եթե նա այս պարագայում իսկապես օրենքի պաշտպան է ու օրինականության առաջամարտիկ, ինչպես փորձում է ինքզինքը մատուցել, ապա վայրկյան անգամ պետք է չհապաղեր՝ իր ձեռքի տակ ունեցած փաստերը հանրայնացնելու կամ դրանց օգնությամբ մեղավորներին պատասխանատվության ենթարկելու՝ անկախ այն հանգամանքից, թե պահի քաղաքական շահն իրեն ինչ է թելադրում կամ պարտադրում: Մյուս կողմից՝ հարց է առաջանում, թե Փաշինյանի նախազգուշացումների հասցեատերը միայն Վարդան Ղուկասյա՞նն է, թե՞ ողջ ԲՀԿ-ն: Օրինակ՝ Արարատ Միրզոյանի օգնական Վահան Կոստանյանը շտապել էր հանդես գալ նախազգուշական ուղերձով՝ ուղղված ամբողջ ԲՀԿ-ին և կրկին օրենքով գողերի մասին օրենքի կոնտեքստում՝ հույս հայտնելով, որ ԲՀԿ-ն դասեր կքաղի՝ կատոկի տակ կրկին չընկնելու համար : Նկատենք, որ սրան ի պատասխան ԲՀԿ խմբակցության փորձագետ Վահե Գրիգորյանը Կոստանյանին կոչ էր արել հանգիստ վեր ընկնել տեղը : Փաշինյանի հայտարարություններն ակնհայտորեն բխում են հենց վերոհիշյալ տրամաբանությունից, ինչը, թերևս, բացատրվում է նրա քաղաքական վախերով: ԲՀԿ-ն ցույց է տալիս, որ շատ կոնկրետ հարցերում մտադիր չէ գործարքի գնալ իշխանությունների հետ: Ավելին՝ ԲՀԿ-ն հստակորեն հասկացնում է, որ ընդունակ է իրական ընդդիմություն դառնալու Նիկոլ Փաշինյանին այն դեպքում, եթե իշխանությունների կողմից հատվեն որոշ կարմիր գծեր, իսկ մի իրավիճակում, երբ փողոցը հետզհետե սկսում է եռալ, Նիկոլ Փաշինյանին այլ բան չի մնում, քան սպառնալիքի միջոցով ստիպել ԲՀԿ-ին մաս չդառնալ իր համար վտանգավոր պրոցեսներին՝ ցանկացած դրսևորմամբ. այլ բան չի մնում, քան մտրակելն ու հեղափոխական տերմինաբանությամբ սպառնալիքներ հնչեցնելն, ինչն առնվազը կոռեկտ չէ: Արմեն Կարեյան

Related news

Latest News
Hashtags:   

Նիկոլ

 | 

Փաշինյանի

 | 

շանտաժը

 | 

թիրախում

 | 

կրկին

 | 
Most Popular (6 hours)

Most Popular (24 hours)

Most Popular (a week)

Sources