Monday 20 January 2020
Home      All news      Contact us      English
tert.am - 1 month ago

Ճանապարհային երթևեկության բալային համակարգում հաշվի առնված չէ տրանսպորտային միջոցով աշխատողների գործոնը. փորձագետ

Ճանապարհային երթևեկության բալային համակարգի ներդրումը դրական դեր կարող է խաղալ վարորդների զգոնության բարձրացման տեսանկյունից, բայց ողջ բնակչության համար մի շարք նոր խնդիրներ է ենթադրում, այդ թվում՝ ֆինանսական: Tert.am-ի հետ զրույցում ասաց Հայացք վերլուծական կենտրոնի փորձագետ Լիլիա Ամիրխանյանը՝ մեկնաբանելով Ճանապարհային երթևեկության կանոնակարգման բալային համակարգի ներդրման օրինագիծը: Համակարգի համաչափ կիրառումը վարորդական վկայական ունեցող բոլոր քաղաքացիների նկատմամբ սոցիալական նոր ճեղքեր է բացում, քանի որ չկա տարանջատում՝ օրվա մեջ մի քանի ժամ և ամբողջ օրը երթևեկող վարորդների միջև ,-ասել է նա: Փորձագետը պնդում է՝ լավ կլիներ ներդրվող համակարգում տարանջատում մտցվեր վարորդների միջև. Մի բան է, երբ տրանսպորտային միջոցը մարդու համար զուտ փոխադրամիջոց է, մեկ այլ բան, երբ ծառայեցվում է աշխատանքին: Հայաստանում շատ են տաքսու վարորդները, որոնց համար դա եկամուտների ստացման միակ աղբյուրն է: Այդ մարդիկ առավոտից միչև ուշ երեկո մեքենայի ղեկին են, ուստի տարատեսակ խախտումներ կատարելու հավանականությունը նրանց մոտ ավելի մեծ է : Ամիրխանյանի կարծիքով՝ այս պարագայում այն փաստը, որ որոշ տուգանքների չափը փոքրացվել է, հնարավոր է շատ մեծ դեր չունենա, որովհետև անընդհատ երթևեկող վարորդի մոտ ավելի հավանական է շատ մանր խախտումներով բալեր կորցնելը, քան մեկ մեծ խախտումով մեծ տուգանք վճարելը: Այդ մարդիկ զրկվում են եկամուտների իրենց աղբյուրից: Սա իր հերթին չի կարող բացասական ազդեցություն չունենալ տնտեսական ակտիվության ցուցանիշի և հանրային տրամադրությունների վրա՝ գլոբալ իմաստով ,- ասել է նա: Լիլիա Ամիրխանյանի կարծիքով՝ բացի նշված խնդիրը, կա մեկ այլ խնդիր ևս. այս համակարգի ներդրումը չի արվում ինչ որ այլ բանի փոխարեն: Սա, ըստ էության, ի հավելումն է գործող բոլոր պատժամիջոցների, այսինքն՝ լրացուցիչ բեռ է հանրության համար: Հիշենք մի քանի ամիս առաջ անհատ տաքսու վարորդներին Երևանում 8000 և մարզերում 12000 դրամ պարտադիր վճարներից ազատելու փաստը: Այս համակարգով, ստացվում է, որ տրված արտոնությունը կկորցնի իր դրական էֆեկտը բոլոր այն հավանական դեպքերում, երբ ինչ-որ պահից վարորդը զրկվի գումար աշխատելու հնարավորությունից: Այս քաղաքականությունը, կարծես, դառնում է ձեռագիր ,- նշում է Ամիրխանյանը: Եվ, ի վերջո, կա խնդրի այլ կողմ ևս՝ միջազգային փորձի կիրառության հետ կապված: Արդյո՞ք զարգացած երկրների փորձի ուղղակի ներդրումը մեզ համար արդարացված է: Հաշվի առնվա՞ծ են ճանապարհային երթևեկության այն խնդիրները, որոնք այսօր կան մայրաքաղաքում, հաշվի առնվա՞ծ են զբաղվածության խնդիրները. վարորդական վկայականից կես կամ մեկ տարով զրկված տաքսու վարորդին ինչպե՞ս հետ պահել արտագնա աշխատանքից ,- ասել է նա: Փորձագետի պնդմամբ՝ սրանք հարցեր են, որոնք համակարգի գործարկումից հետո ստիպելու են գտնել լուծումներ. Լավ կլիներ՝ համակարգին անցումն իրականացվեր փուլերով և հընթացս նաև գտնվեին տարատեսակ խնդիրների լուծումները: Մինչդեռ կրկին գործ ունենք շտապողականության հետ ,- ամփոփեց Լիլիա Ամիրխանյանը:

Related news

Latest News
Hashtags:   

Ճանապարհային

 | 

երթևեկության

 | 

բալային

 | 

համակարգում

 | 

հաշվի

 | 

առնված

 | 

տրանսպորտային

 | 

միջոցով

 | 

աշխատողների

 | 

գործոնը

 | 

փորձագետ

 | 
Most Popular (6 hours)

Most Popular (24 hours)

Most Popular (a week)

Sources