Սարգիս Գալստյանի դեպքում բռնի ուժ գործադրելու մասին 316-րդ հոդվածը չպետք է կիրառվի, նա նման բան չի արել. ոստիկանի սպանության մեջ մեղադրվող եղբայրների պաշտպաններ

Գործը նախաքննության փուլում է, այս պահին ակտիվ քննչական գործողությունն է կատարվում, վկաներ են հարցաքննվում, տարածքներից տեսանյութեր են դիտվում: Այս մասին Tert.am-ի հետ զրույցում ասաց ոստիկանի սպանության և մեկ այլ ոստիկանի մարմնական վնասվածք հասցնելու մեջ մեղադրվող երիտասարդներից Հրաչ Գալստյանի պաշտպան Սեդրակ Մկրտչյանը ներկայացնելով գործի մանրամասները: Իմ պաշտպանյալի հետ այս փուլում դեռևս ոչ մի գործողություն չի իրականացվել, քանի որ փորձաքննության փուլն է ,-ասաց նա: Հիշեցնենք, որ Արաբկիրի պահպանության բաժնի ոստիկան 38-ամյա Տիգրան Առաքելյանի սպանության, ոստիկանների վրա հարձակման գործով մեղադրանք է առաջադրվել երկու եղբայրներին՝ 16-ամյա Հրաչ Գալստյանին ու 18-ամյա Սարգիս Գալստյանին: Պաշտպանը նշեց, որ իր պաշտպանյալը կասկածյալի կարգավիճակում տրված ցուցմունքում ամեն ինչ ասել է, իսկ որպես մեղադրյալ՝ հարցաքննության ժամանակ կոնկրետացրել իր ցուցմունքը փաստական հանգամանքների վերաբերյալ: Նախաքննությունը գաղտնի է և պաշտպանական կողմը քննիչի գործողություններից տեղյակ չէ ,-ասաց նա և նշեց, որ Հրաչ Գալստյանը հաշվառված է հոգեկան առողջության կենտրոնում և այժմ կալանավորված է: Մեղադրվող եղբայրներից Սարգիս Գալստյանի պաշտպան Վահագն Քեշիշյանը նշեց, որ քննիչների գործողություններում կանխակալ մոտեցում չի տեսնում: Աշխատանքը իր հունով գնում է, օբյեկտիվ քննություն է իրականացվում ,-ասաց նա: Ըստ նրա Սարգիս Գալստյանի դեպքում 316 հոդվածը չպետք է կիրառվի: Իմ անձնական կարծիքով քրեական օրենսգքրի 316 հոդվածով մեղադրանք չպետք է լինի Սարգիս Գալստյանի վերաբերյալ: Հոդվածը վերաբերում է ոստիկանի նկատմամբ բռնի ուժ գործադրելու կամ դրա սպառնալիքին: Նման բան իմ պաշտպանյալը չի արել, որևէ առնչություն չունի դրա հետ ,-ասաց նա: Պաշտպանը նշեց, որ շատ մեծ հույս ունի, որ ի վերջո մեղադրական եզրակացությունում նման հոդված չի լինի, քանի որ այդ հոդվածի համար ապացույցները բավարար չեն, և հիմնավոր չեն; Հիշեցնենք, որ Գալստյան եղբայրները սովորականի պես դուրս են եկել տանից հերթական գողության հետքերով, ապա կողոպուտից հետո հանդիպել են ոստիկանության ծառայողների խոչընդոտին, նախ փախել են, ապա՝ դիմադրել, այնուհետև ոստիկաններից մեկի զենքով սպանել են մյուս ոստիկանին ու հանգիստ վերադարձել տուն, իրավապահներին չեն ներկայացել: Նշենք, որ դեպքի առթիվ հարուցվել է քրեական գործ՝ ՀՀ քրեական օրենսգրքի 238-րդ հոդվածի 1-ին մասով, 316-րդ հոդվածի 2-րդ մասով և 104-րդ հոդվածի 1-ին մասով:

Read on the original site