Tuesday 19 November 2019
Home      All news      Contact us      English
azatutyun - 12 days ago

Արայիկ Հարությունյան․ Դաշնակցությունը անդաստիարակ պահվածք է դրսևորում

Իշխող «Քաղաքացիական պայմանագիր» կուսակցության վարչության անդամ, Կրթության, գիտության, մշակույթի և սպորտի նախարար Արայիկ Հարությունյանն այսօր կառավարության նիստին հետևած ճեպազրույցի ընթացքում հայտարարեց, թե Դաշնակցությունը անդաստիարակ պահվածք է դրսևորում, իսկ ՀՅԴ հայաստանյան կառույցի ղեկավարությունը կապված է նախկին իշխանությունների հետ՝ արհեստական խնդիրներ ստեղծելով Փաշինյանի կառավարության համար: «Նախ ուզում եմ դիմել ոչ-հայաստանցի դաշնակցականներին, նրանց ղեկավարությանը, որպեսզի տեր կանգնեն իրենց կուսակցությանը, որովհետև այն անդաստիարակ պահվածքը, որը դրսևորում է Դաշնակցությունը, պատիվ չի բերում մեր ամենահին կուսակցություններից մեկին:Եվ առիթ ունեցել են մի քանի անգամ «Նախագահ, մի զիջիր» տիպի ակցիաներ անելու, որը շատ հաճախ ձախողվել է, և ես կարծում եմ, որ Դաշնակցությունը հատկապես նախորդ տարվա իրադարձություններից հետո այլ կեցվածք պետք է դրսևորեր, և նախ հասկանար, թե ինչու մերժվեց հասարակության կողմից, և երկրորդը, փոխեր անձերին, որովհետև նրանք տապալում են Դաշնակցությանը և շարունակում են տապալել: Այն գործողությունները, որ հիմա տեղի են ունենում, միայն բացասաբար են ազդում: Հանրության արձագանքն էլ նրանց գործողություններին տեսնում եք»: «Ազատության» հարցին, թե ինչն ի նկատի ունի, երբ ասում է դրսի դաշնակցականներին դիմելու մասին, Հարությունյանը պատասխանեց․ - «Ես երբ որ լինում եմ գործուղումներում արտասահմանում, պարտադիր հանդիպում եմ դրսում գործող մեր կառույցների ներկայացուցիչների հետ՝ այդ թվում և Դաշնակցության, և տեսնում եմ, որ այնտեղ դաշնակցական մեր գործընկերները շատ ադեկվատ են, շատ պատրաստակամ են կառուցողական աշխատանքի, ինչը այստեղ չեմ տեսնում»: «Ազատության» հաջորդ հարցին, թե արդյոք կարծում է, որ տեղի Դաշնակցության ղեկավարությունը կապված է նախկին իշխանությունների հետ և փորձում է, օրինակ, խնդիրներ հարուցել կառավարության համար, նախարարն արձագանքեց․ - «Բնականաբար: Էն փոփոխությունները, մասնավորաբար, ինչո՞ւ նրանք սկսեցին աղմկել հատկապես կրթության ոլորտի բարեփոխումներից հետո: Որովհետև տապալել են բազմաթիվ անգամ այս ոլորտի համակարգումը: Ճիշտն ասած, պատրաստվում եմ այն արկղերը, որ երեկ բերել էին, այդ արկղերը լցնեմ տասնյակ և շատ ավելի քրեական գործերով, որոնք վերաբերում են այս ոլորտին, և հետ ուղարկեմ իրենց»:      Հարությունյանը մանրամասնեց, թե Կրթության և գիտության երկարամյա նախարար, դաշնակցական Լևոն Մկրտչյանի մասին չէ խոսքը, այլ «նրանց համակարգած համակարգի մասին»՝ հավելելով, որ քրեական գործերով պետք է զբաղվեն համապատասխան մարմինները․ - «Եթե տեսել եք, մեկուկես տարվա ընթացքում ես ըստ էության անդրադարձ չեմ կատարել իմ նախորդի՝ Լևոն Մկրտչյանի գործունեությանը՝ կարծելով, որ դա որոշ չափով ավելորդ ժամանակ է ինձանից տանելու: Բայց հիմա ձեռնամուխ կլինեմ դրան»: Նախարար Արայիկ Հարությունյանի հրաժարականը սկսեցին պահանջել, այդ թվում Դաշնակցության երիտասարդական թևը, երբ նախարարությունը հանդես եկավ օրենսդրական նախաձեռնությամբ՝ «Հայերեն», «Հայ գրականություն» և «Հայոց պատմություն» առարկաների պարտադիր դասավանդումը բուհերում դարձնել կամընտրական: Հարցը սրվեց մետրոյի «Հանրապետության հրապարակ» կայարանի դիմաց օրերս տեղի ունեցած աղմկահարույց «ՀուԶանք ու Զանգ» ներկայացումից հետո, երբ պարզվեց, որ ներկայացման համար Կրթության, գիտության, մշակույթի և սպորտի նախարարությունը հատկացրել է 2,7 միլիոն դրամ դրամաշնորհ: Այսօր կառավարության շենքի դիմաց ՀՅԴ Հայաստանի երիտասարդական միության ներկայացուցիչները բողոքի ակցիա էին անցկացնում՝ պահանջելով Հարությունյանի հրաժարականը: Բողոքի ակցիան շարունակվեց նախարարության շենքի դիմաց՝ նստացույցով: Ցուցարարները վանկարկում էին «Արայիկ, հեռացիր»: Արայիկ Հարությունյանը կարծես անդրդվելի է․ - «Ես պատրաստ եմ հրաժարական տալ այն ժամանակ, երբ որ կկարծեմ, որ իմ լիազորությունները բավարար չեմ կատարում: Սա այդ իրավիճակը չէ»:

Related news

Latest News
Hashtags:   

Արայիկ

 | 

Հարությունյան․

 | 

Դաշնակցությունը

 | 

անդաստիարակ

 | 

պահվածք

 | 

դրսևորում

 | 
Most Popular (6 hours)

Most Popular (24 hours)

Most Popular (a week)

Sources