Wednesday 13 November 2019
Home      All news      Contact us      English
tert.am - 26 days ago

Համանախագահների այցը տարածաշրջան մտահոգիչ օրինաչափություն ի հայտ բերեց. փորձագետ

Առկա լարված իրավիճակում համանախագահների տարածաշրջանային այցից մեծ ակնկալիքներ, ըստ էության, չկային: Սակայն այցն ի հայտ բերեց մեկ այլ՝ բավական մտահոգիչ օրինաչափություն: Այս մասին Tert.am-ի հետ զրույցում նշեց Հայացք վերլուծական կենտրոնի փորձագետ Հերմինե Մխիթարյանը՝ անդրադառնալով ԵԱՀԿ Մինսկի խմբի համանախագահների տարածաշրջանային այցին և այդ այցն ամփոփող համատեղ հայտարարությանը: Համանախագահների այցը տարածաշրջան տեղի ունեցավ բավական լարված մթնոլորտում: Մի կողմից՝ ընդհանուր տարածաշրջանային զարգացումները, մյուս կողմից՝ սահմանային սրացման դեպքերը հայ-ադրբեջանական և ղարաբաղա-ադրբեջանական սահմաններին և, ի վերջո, կողմերի կոշտ հռետորաբանությունը. Երևանից հայտարարում են Արցախը Հայաստան է, և վերջ , իսկ Բաքվից պատասխանում՝ Ղարաբաղը Ադրբեջան է, և բացականչական նշան : Նման իրավիճակում մեծ ակնկալիքներ համանախագահների այցից, ըստ էության, չկային , ասաց նա: Սակայն, ըստ նրա, համանախագահների այցն ի հայտ բերեց մեկ այլ, շատ հետաքրքիր և մտահոգիչ օրինաչափություն: Այս այցի ընթացքում ևս, ինչպես իրենց նախորդ տարածաշրջանային այցերի ժամանակ, համանախագահները Բաքվում հանդիպեցին նաև այսպես կոչված Ղարաբաղի ադրբեջանական համայնքի ներկայացուցիչներին: Եվ չնայած ադրբեջանական այս միավորի հետ հանդիպումներ համանախագահներն ունեցել են նաև նախկինում, վերջին շրջանում, մասնավորապես՝ 2018-ի մայիսից ի վեր, հանդիպումները պարբերական ու որ ամենամտահոգիչն է՝ արդեն ինստիտուցիոնալ բնույթ են ստանում , - նշեց նա։

Փորձագետը պարզաբանեց, որ եթե 2018-ի նոյեմբերին իրենց հանդիպումը համանախագահները ներկայացնում էին՝ որպես հանդիպում հակամարտությունից տուժած ադրբեջանական համայնքների հետ , ապա այսօր արդեն ներկայացնում են՝ որպես հանդիպում Ղարաբաղի ադրբեջանական համայնքի ղեկավարի հետ : Ըստ էության, 2018-ի մայիսից ի վեր համանախագահներն իրենց տարածաշրջանային այցերի ընթացքում միայն մեկ անգամ չեն այցելել Ստեփանակերտ՝ 2019-ի փետրվարին: Այդ այցի շրջանակներում հանդիպում չի եղել նաև այսպես կոչված Ղարաբաղի ադրբեջանական համայնքի հետ: Մնացած բոլոր դեպքերում Ստեփանակերտում Արցախի իշխանությունների հետ հանդիպումից հետո Բաքվում կայացել է համանախագահների հանդիպումը ադրբեջանական այդ համայնքի հետ: Սա մտահոգիչ տենդենց է, որն առավել ակնհայտ է դառնում, երբ փորձում ենք դիտարկել բանակցային գործընթացի ցանկացած այլ ժամանակահատվածի հետ համեմատության մեջ , ասաց Հերմինե Մխիթարյանը։ Փորձագետը հիշեցրեց, որ օրինակ՝ հեղափոխությանը նախորդած մեկուկես տարում համանախագահները հինգ անգամ այցելել են տարածաշրջան, որոնցից միայն մեկի ընթացքում՝ 2017-ի հունիսին, հանդիպում են ունեցել Ղարաբաղի ադրբեջանական համայնքի հետ, իսկ Արցախ այցելել են հինգ այցերից չորսի ընթացքում: Նույն տրամաբանությամբ կարող ենք դիտարկել ցանկացած այլ համապատասխան ժամանակահատված , - ավելացրեց նա։ Հերմինե Մխիթարյանի կարծիքով՝ պաշտոնական Բաքուն հմտորեն օգտվեց հայաստանյան նոր իշխանությունների առաջին հայտարարություններից, որ Արցախը պետք է վերադառնա բանակցային սեղան՝ դրան ի պատասխան առաջին պլան բերելով իր կողմից արհեստածին այդ միավորը:

Բաքուն ռեբրենդինգի ենթարկեց Ղարաբաղի ադրբեջանական համայնքը , փոխեց ղեկավարին՝ այդ պաշտոնում նշանակելով կադրային դիվանագետ Թուրալ Գյանջալիևին, ձեռնամուխ եղավ միջազգային հարթակներում դրա ամենալայն ներգրավվածության ու մասնակցության ապահովմանը , - նշեց փորձագետը՝ հավելելով, որ համանախագահների այցերի ու բառակազմի փոփոխությունն այս աշխատանքի ակնհայտ արդյունքներից մեկն է և ցուցիչ, որ հայկական կողմը բավարար ջանք չի գործադրել նման զարգացումները կանխելու և նման սցենարները բացառելու ուղղությամբ:

Բաքուն բանակցային սեղան Արցախի վերադառնալու արդարացի պահանջին ի պատասխան առաջ է քաշում Ղարաբաղի ադրբեջանական համայնքի ներգրավվածության հարցը՝ դրանով փորձելով խնդիրը տեղափոխել միջհամայնքային հարթություն: Սրան հայկական կողմը բավարար ուշադրություն չդարձրեց 2018-ին, շարունակում է անտեսել նաև այժմ, ինչի հետևանքները տեսանելի են արդեն ԵԱՀԿ Մինսկի խմբի հայտարարություններում ,- եզրափակեց Հերմինե Մխիթարյանը:

Related news

Latest News
Hashtags:   

Համանախագահների

 | 

տարածաշրջան

 | 

մտահոգիչ

 | 

օրինաչափություն

 | 

բերեց

 | 

փորձագետ

 | 
Most Popular (6 hours)

Most Popular (24 hours)

Most Popular (a week)

Sources