Tuesday 19 November 2019
Home      All news      Contact us      English
tert.am - 1 month ago

Քրդական ուժերն էական դիմադրություն կարող էին ցույց տալ Թուրքիային, եթե ժամանակին չլինեին ամերիկյան երաշխիքները. քրդագետ (տեսանյութ)

Քրդական ուժերն անհամեմատ ավելի էական դիմադրություն կարող էին ցույց տալ Թուրքիային, եթե ժամանակին չլինեին ամերիկյան երաշխիքները: Հայացք Երևանից. Երկրագունդ հաղորդման շրջանակներում ասել է ԵՊՀ Միջազգային հարաբերությունների և դիվանագիտության ամբիոնի վարիչ Վահրամ Պետրոսյանը:

Նա ընդգծել է, որ ռազմական թատերաբեմում ոչ մի ուժ էական արգելքներ չի ստեղծել Թուրքիայի համար: Քրդական ուժերն անհամեմատ ավելի էական դիմադրություն կարող էին ցույց տալ, եթե ժամանակին չլինեին ամերիկյան երաշխիքները: Ամերիկյան երաշխիքների ներքո քրդերը թուլացրին մերձսահմանային գոտու իրենց ամրությունները, այլ կերպ ասած՝ վերացրին ռազմական ամրությունները, հետ քաշեցին իրենց զորքերը, այդ թվում՝ ռազմական տեխնիկան: Այդ պահից սկսած, բնական է, դիմադրության նրանց հնարավորությունները թուլացան ,- ասել է Պետրոսյանը: Քրդագետն այդ համատեքստում նշել է, որ Թուրքիան այս պահի դրությամբ բոլոր տարածքները գրավել է առանց լուրջ դիմադրության, սակայն էական մարտը դեռ առջևում է: Նրա գնահատմամբ, Սիրիայի քրդերը Թուրքիայի համար լուրջ սպառնալիք նախկինում չէին ներկայացնում, սակայն այս օպերացիայից հետո իրավիճակը փոխվելու է: Անկախ նրանից, թե կոնֆլիկտը որքան ժամանակ կտևի, ինչպես կկարգավորվի՝ քանի դեռ քրդական ուժերն այնտեղ են, այսուհետ Անկարան պետք է քրդական սպառնալիք սպասի նաև Սիրիայից: Այլ կերպ ասած, Թուրքիան մի կողմից ձգտեց սահմանափակել սպառնալիքը, մյուս կողմից՝ ստացավ անկանխատեսելի սպառնալիքի աղբյուր ,- ասել է նա:

Թուրքիան ձգտում է բացառել քրդական միավորի ամրապնդումը և, միաժամանակ, ամրապնդել իր դիրքերը Սիրիայում: Բացի այդ, նրանք ձգտում են տեղում ունենալ իրողություն, որն իրենց հնարավորություն կտա ավելի լուրջ կերպով ներգրավվել սիրիական կարգավորմանը ,- նշել է Պետրոսյանը:

Անդրադառնալով այն հարցին, թե ինչի դիմաց են Սիրիայի իշխանությունները համաձայնել աջակցել քրդերին՝ Վահրամ Պետրոսյանը նշել է, որ սա փոխադարձ ձեռնտու պայմանավորվածություն է, և քրդերը չեն հրաժարվել ինքնավարության հասնելու գաղափարից: Այն տարածքները, որ քրդերը զբաղեցնում են, ժամանակին զիջվել են Սիրիայի կողմից: Սիրիայի դիտանկյունից քրդերն այսօր չարյաց փոքրագույնն են : Քրդերի համար էլ սիրիական ռեժիմը եղել է ամենևին ոչ երանելի ռեժիմ, այնուամենայնիվ, առավել ընդունելի տարբերակը սա է ,- ասել է Պետրոսյանը՝ ընդգծելով, որ և՛ Սիրիայի իշխանությունները, և՛ քրդերը գերադասում են միմյանց զիջել և հետ վերցնել տարածքները, քան թույլ տալ դրանց հանդեպ արտաքին վերահսկողություն:

Անդրադառնալով քրդերի հայտարարությանը, որ իրենք դադարեցնում են հակաահաբեկչական գործողություններն ԻՊ-ի դեմ՝ քրդագետը նշել է. Քրդերը հասել են նրան, որ Սիրիայի քրդական ուժերը չեն որակվում որպես ահաբեկչական: Նրանք արդեն իսկ հասել էին մի որոշակի լեգիտիմ ընկալման և կարգավիճակի: Եվ այդ կարգավիճակը նրանց տվել էր նաև Իսլամական Պետության դեմ պայքարը: Քրդերի արժեքն Արևմտյան կողմի տեսանկյունից մեծ էր հենց ԻՊ դեմ պայքարի համատեքստում, և այդ հաղթաթուղթը քրդերը, բնական է, որ պիտի ձգտեն օգտագործել: Եվ սա պետք է անհանգստացնի ոչ միայն ԱՄՆ-ին, այլև Ռուսաստանի Դաշնությանը :

Նրա դիտարկմամբ, ամերիկյան կողմը թույլ չի տա քրդական խաղաքարտի լիարժեք թուլացում: Քրդերը, որքան էլ ցավալի է, ԱՄՆ-ի համար խաղաքարտ են, և ԱՄՆ-ն չի ցանկանա խաղաքարտերի այդ բազմազանությունը փոքրացնել :

Պետրոսյանը նշել է, որ քրդերի համար պատերազմը նորմալ իրողություն է: Այնպես որ, ռազմական գործողություններով քրդերին վախացնել չեն կարող: Քրդերի համար ուրիշների վրա հույս դնելը մշտապես ժամանակավոր է եղել և նրանք միշտ հիասթափվել են ,- ասել է նա:

Մանրամասները տեսանյութում։



Related news

Latest News
Hashtags:   

Քրդական

 | 

ուժերն

 | 

էական

 | 

դիմադրություն

 | 

կարող

 | 

ցույց

 | 

Թուրքիային

 | 

ժամանակին

 | 

չլինեին

 | 

ամերիկյան

 | 

երաշխիքները

 | 

քրդագետ

 | 

տեսանյութ

 | 
Most Popular (6 hours)

Most Popular (24 hours)

Most Popular (a week)

Sources