Thursday 19 September 2019
Home      All news      Contact us      English
azatutyun - 9 days ago

Դեմոկրատները Թրամփի ենթադրալ դավադրությունն են քննում

Ամերիկայի Միացյալ Նահանգների Կոնգրեսի Ներկայացուցիչների տան դեմոկրատականները հարուցել են հետաքննություն, որի նպատակն է պարզել, թե արդյո՞ք հանրապետական նախագահ Դոնալդ Թրամփը ճնշում է բանեցրել Ուկրաինայի վրա՝ ցանկանալով վարկաբեկող նյութեր կորզել գալիք նախագահական ընտրություններում առաջադրվելու մտադրություն ունեցող դեմոկրատական թեկնածուների, մասնավորապես՝ Ջո Բայդենի մասին: Ներկայացուցիչների տան արտաքին հարաբերությունների, հետախուզության և վերահսկողության ու բարեփոխումների կոմիտեները նամակ են ուղարկել նախագահի խորհրդական Փաթ Չիպոլոնեին, պահանջելով, որ Սպիտակ տունը տրամադրի մի շարք փաստաթղթեր, այդ թվում Թրամփի և Ուկրաինայի նախագահ Վլադիմիր Զելենսկու հեռախոսազրույցի սղագրությունը: Այդ երեք հանձնաժողովները դեմոկրատականների հսկողության տակ են: Ուկրաինայի վրա ենթադրյալ ճնշումների թվում է 250 միլիոն դոլարի ռազմական օգնության սառեցումը: «Եթե նախագահը փորձում է ճնշում բանեցնել Ուկրաինայի վրա, ստիպելով կամ առանց ամերիկյան օգնության դիմադրել ռուսական ագրեսիային, կամ տրամադրել նյութեր, որոնք ձեռնտու են Թրամփի ընտրարշավին, ապա դա պաշտոնեական դիրքի չարաշահման աղաղակող օրինակ է, նվեր Մոսկվային և հանրային վստահության դավաճանություն»,- ասվում է երեք կոմիտեների կազմած նամակում: Թրամփի անձնական փաստաբան, քաղաքական երդվյալ զինակից և Նյու Յորքի նախկին քաղաքապետ Ռուդի Ջուլիանին պնդում է, որ այդ հարցուցված հետաքննությունը սոսկ հալածանք է, որի հիմքում քաղաքական դրդապատճառներ են: «Սա ապօրինի է, սա հալածանք է, որի հեղինակը ոչ թե Կոնգրեսն է, այլ դեմոկրատների ազգային կոմիտեն», - Վաշինգտոնում հրատարակվող The Hill պարբերականին երեկ տված հարցազրույցում ասել է Ջուլիանին: Այս տարի ավելի վաղ Միացյալ Նահանգները հաստատել է 250 միլիոն դոլարի ռազմական օգնությունն Ուկրաինային: 2016 թվականի օգոստոսին Ուկրաինայում հրապարակվել են նյութեր, որոնք ապացուցում են, որ Թրամփի այն ժամանակաշրջանի ընտրարշավի ղեկավար Փոլ Մանաֆորթը 12 միլիոն 700 հազար դոլար չհայտարարագրած հոնորար է ստացել ռուսամետ դիրքերից հանդես եկող Ռեգիոնների կուսակցությանը խորհրդատվական ծառայություն մատուցելու համար: Այդ սկանդալից հետո Մանաֆորթն ընտրություններից երեք ամիս առաջ ազատել է նախընտրական շտաբի ղեկավարի պաշտոնն ու ի վերջո բանտարկվել է փողի լվացման հոդվածով: Դեռ այն ժամանակ լուրեր են տարածվել ռուսների հետ Թրամփի թիմակիցների կասկածելի կապերի մասին: Financial Times-ը 2016-ին վկայակոչել է ուկրաինացի օրենսդիր և հետաքննող լրագրող Սերգեյ Լեշչենկոյին, ով ասել է, թե «Դոնալդ Թրամփը ռուսամետ թեկնածու է և ի զորու է փոխել ամերիկյան արտաքին քաղաքականության ուկրաինամետ օրակարգը»: Հիմա էլ Թրամփն է փորձում մրցակիցների դիրքերը թուլացնել և թիրախավորված հարվածում է նախկին դեմոկրատական փոխնախագահ Ջո Բայդենին: Նրա որդին՝ Հանթեր Բայդենը, 2014 թվականին դարձել է Ուկրաինայի էներգետիկայի ոլորտում աշխատող Burisma Holdings ընկերության կառավարիչների խորհրդի անդամ: Ընկերության ղեկավարը Միկոլա Զլոչևսկին է, ով Վիկտոր Յանուկովիչի նախագահության օրոք զբաղեցրել է շրջակա միջավայրի և բնական պաշարների նախարարի պաշտոնը: Ըստ ուկրաինացի քննիչների, ընկերությունը շահավետ պայմանագրեր է կնքել այն ժամանակ, երբ Զլոչևսկին նախարար է աշխատել, ինչը շահերի բախման օրինակ է: Փոխնախագահ Բայդենը Կիևից պահանջել է պաշտոնանկ անել կոռուպցիայի մեջ մեղադրվող գլխավոր դատախազին: Ջուլիանին մեկնել է Ուկրաինա, նպատակ ունենալով պարզել, թե արդյոք Բայդենն է սառեցրել Burisma Holdings ընկերության գործունեության հետաքննությունը: Բայդեն ավագը կտրականապես հերքում է այդ լուրը, Բայդեն կրտսերն այս տարեսկզբին դուրս է եկել Burisma Holdings-ի կառավարիչների կազմից: Ուկրաինայի նախագահի մամլո գրասենյակը նկատել է տվել, որ Զելենսկու հետ հեռախոսազրույցում Թրամփը արծարծել  Բայդենի թեման: Համենայն դեպս, ԱՄՆ նախագահը հույս է հայտնել, որ «Ուկրաինան կավարտի Վաշինգտոնի և Կիևի համագործակցությունը խոչընդոտող կոռուպցիոն դեպքերի քննությունը»: Զելենսկին սեպտեմբերի 23-ին մեկնելու է Նյու Յորք՝ մասնակցելու ՄԱԿ-ի Գլխավոր ասամբլեայի 74-րդ նստաշրանին: Չի բացառվում, որ Թրամփը և Զելենսկին հանդիպեն Նյու Յորքում: Նրանց հանդիպումը նախատեսված էր հուլիսին կամ օգոստոսին, սակայն տարատեսակ հանգամանքների բերումով հետաձգվել է: «Վաշինգտոն Փոստը» վկայակոչել է ուկրաինացի մի անանուն պաշտոնյայի, ով ասել է, թե «Զելենսկու թիմը չի ցանկանում ներքաշվել ամերիկյան ներքաղաքական վեճին»:        

Related news

Latest News
Hashtags:   

Դեմոկրատները

 | 

Թրամփի

 | 

ենթադրալ

 | 

դավադրությունն

 | 

քննում

 | 
Most Popular (6 hours)

Most Popular (24 hours)

Most Popular (a week)

Sources