Friday 23 August 2019
Home      All news      Contact us      English
tert.am - 9 days ago

Ինչո՞ւ ձերբակալվեց Աթամբաևն ու ի՞նչ կապ ունի դրա հետ վաղեմի կուսակից ընկերը. Ղրղզստանի ներքաղաքական իրադարձությունների ժամանակագրությունը

Մինչև Հայաստանն ապրում է իր ներքին խնդիրներով, ոչ հեռավոր Ղրղզստանում ներքաղաքական բուռն իրադարձություններ են զարգանում նախկին նախագահ Ալմազբեկ Աթամբաևի ձերբակալության շուրջ: Աթամբաևն իշխանության էր եկել 2011թ.-ին՝ զբաղեցնելով Ղրղզստանի 4-րդ նախագահի պաշտոնը ու հրաժարվել էր դրանից 2017թ.-ին: Նա Ղրղզստանի պատմության մեջ առաջին նախագահն է, ով հրաժարվել է իր լիազորությունից պաշտոնավարման առաջին ժամկետում՝ չմասնակցելով հաջորդ ընտրություններին: Ի տարբերություն իր նախորդների՝ Աթամբաևը ստիպված չի եղել լքել պաշտոնը հեղաշրջման արդյունքում ու չի փախել երկրից: Իսկ ինչո՞ւ ղրղզական պատմության համար դեմոկրատական նշանակության քայլ կատարած նախկին նախագահը ձերբակալվեց: Ամեն ինչ սկսվեց նրանից, որ 2019թ.-ին Ղրղզստանի խորհրդարանը ստեղծեց հանձնաժողով, որը զբաղվում էր Աթամբաևին անձեռնմխելիությունից զրկելու հարցով: Հանձնաժողովականների աշխատանքի արդյունքում, ինչպես իրենք են նշում, հավաքվեցին մի շարք փաստարկներ, որոնք վկայում էին Աթամբաևի մեղավորության մասին: Արդյունքում՝ դատախազությունը Աթամբաևի դեմ ներկայացրեց մեղադրանքների մեծ տրցակ, որոնց համաձայն՝ նախկին նախագահը մեղադրվում է Բիշքեքի ջերմաէլեկտրակայանի մոդեռնիզացիայից հետո ստեղծված կոռուպցիոն սխեմաներում ներգրավվելու մեջ, հողերի անօրինական տրանսֆորմացիայի, քրեական հեղինակություն Ազիզ Բատուկաևին կեղծ առողջապահական փաստաթղթերի հիման վրա ազատ արձակելու մեջ, իշխանությունն ուզուրպացնելու և այլ անօրինական գործողությունների մեջ: Ջերմաէլեկտրակայանի կառույցի արդիականացման ընթացքում բյուջեից մսխվել էր ավելի քան 110 միլիոն դոլար: Բացի այդ, Աթամբաևը ապօրինի կերպով հսկայական հողակտորի սեփականատեր է դարձել մայրաքաղաքի մերձակայքում և օգտագործել պաշտոնեական դիրքը՝ նախկինում իրեն պատկանող ընկերությունն առաջ տանելու, դրա միջոցով իր եկամուտները բազմապատկելու համար: Պաշտոնավարման ընթացքում Աթամբաևը 23 հատ հրազեն է նվիրել Ռուսաստանի քաղաքացիներին, որոնք հայտնի են հանցավոր աշխարհի հետ իրենց կապերով ,- հայտարարել էր հանձնաժողովի անդամը: Երեկ հայտնի դարձավ, որ Աթամբաևին առաջադրվել է ևս մեկ մեղադրանք՝ սպանության հոդվածով: Նրա պաշտոնավարման տարիներին մի շարք մտերիմներ նշանակվեցին բարձր պաշտոնների, այդ թվում՝ անձնական վարորդը: 6 տարիների ընթացքում Աթամբաևի վարորդը դարձավ պաշտոնյա ու ներգրավվեց Ղրղզստանի 100 ամենահարուստ անձանց ցուցակում: Աթամբաևի շրջապատի որոշ անդամներ արդեն ձերբակալվել են: Ներկայացված մեղադրանքները պարզելու համար իրավապահ մարմինները 3 անգամ հրավիրել են նախկին նախագահին հարցաքննության, բայց վերջինս չի ներկայացել: Ղրղզստանի օրենքի համաձայն, եթե անձը 2 և ավել անգամ չի ներկայանում հարցաքննության, նրան կարող են ուժով բերման ենթարկել : Օգոստոսի 7-ին իրավապահները հենց այդպես էլ վարվեցին՝ փորձեցին ուժով հարցաքննության տանել նախկին նախագահին, մտան նրա առանձնատուն, բայց չկարողացան բռնել նրան: Ոստիկանների ու աջակիցների բախման հետևանքով, որի ընթացքում կրակոցներ էին եղել, տուժել էին մարդիկ, նրանցից մեկը մահացել էր: Լրագրողների հետ զրույցում Աթամբաևն ասել էր, որ զենք ունի ու կպաշտպանվի, եթե իր հետևից գան , իսկ հետո խոստովանել, որ կրակել է, բայց այնպես, որ տղաներին չդիպչի : Բանակցությունների արդյունքում, ի վերջո, նախկին նախագահը հանձնվեց իրավապաշտպաններին: Նա խորհրդարանականներին անվանեց փսլնքոտներ ու հիշեցրեց, որ ինքը պաշտոնից հեռացել է կամավոր ու եթե ցանկանար, ապա կարող էր սահմանադրական փոփոխությունների արդյունքում շարունակել պաշտոնավարել: Աթամբաևի ձերբակալության մեջ, ըստ տեղական մամուլի, ներգրավված է գործող նախագահ Սոորոնբայ Ժեենբեկովը: Ժեենբեկովին համարում էին Աթամբաևի ժառանգը, որովհետև 1995թ.-ից նա հավատարիմ կերպով անդամակցում էր Աթամբաևի ստեղծած Սոցիալ-դեմոկրատական կուսակցությանը ու նրա հետ միասին պայքարում նախկիններին իշխանությունից հեռացնելու համար: 2018թ.-ին նրանց հարաբերությունները լարվեցին: Ժեենբեկովը հրապարակային հայտարարեց, որ Աթամբաևը փորձում է իր միջոցով շարունակել կառավարել երկիրը: Նա փորձում է ղեկավարել իմ գործողությունները, բայց դա նրան հարգանք չի բերի ,- ասել էր գործող նախագահը: Սրան զուգահեռ Աթամբաևը հայտարարեց, որ իշխանությունը կլանային է դառնում, որ Ժեենբեկովը պաշտոններ է նվիրում իր մտերիմներին ու ներողություն խնդրեց հասարակությունից Ժեենբեկովին պաշտոն տալու համար: Լարված իրավիճակը մեղմելու փորձ էր արել Ռուսաստանի նախագահ Վլադիմիր Պուտինը: Նա հիշեցրել էր, որ Ղրղզստանն արդեն երկու հեղաշրջում է տեսել ու դրանով պետք է սահմանափակվել՝ ղրղզ ժողովրդի շահերից ելնելով: Ղրղզական մամուլը գրում է, որ հավանաբար այս լարվածության հետևանքով էլ գործող նախագահը վրեժ է լուծում նախկին նախագահից: Փորձագետները նշում են, որ ամենայն հավանականությամբ, Աթամբաևը փորձել է Ժեենբեկովին նախագահի պաշտոնը հանձնելուց հետո այն հետ վերցնել կամ էլ Ժեենբեկովն է սկսել անկախ գործունեություն իրականացնել՝ մոռանալով Աթամբաևի գործոնի մասին: Երբեմնի դաշնակիցները հայտնվեցին բարիկադների տարբեր կողմերում: Ղրղզստանի նախկին նախագահին սպառնում է ցմահ ազատազրկում:

Related news

Latest News
Hashtags:   

Ինչո՞ւ

 | 

ձերբակալվեց

 | 

Աթամբաևն

 | 

վաղեմի

 | 

կուսակից

 | 

ընկերը

 | 

Ղրղզստանի

 | 

ներքաղաքական

 | 

իրադարձությունների

 | 

ժամանակագրությունը

 | 
Most Popular (6 hours)

Most Popular (24 hours)

Most Popular (a week)

Sources