Friday 23 August 2019
Home      All news      Contact us      English
azatutyun - 10 days ago

Սեպտեմբերից Հայաստանում Մեծ Բրիտանիայի դեսպանը կլինի հայազգի Ալան Անդրանիկ Գոգբաշյանը

Առաջիկա սեպտեմբերից Հայաստանում Միացյալ Թագավորության դեսպանը կլինի հայազգի Ալան Անդրանիկ Գոգբաշյանը: 45-ամյա դիվանագետը ծնվել և կրթություն է ստացել Մեծ Բրիտանիայում, սակայն փայլուն խոսում է հայերեն և մինչև դեսպանի պաշտոնում նշանակվելը բազմիցս է եղել Հայաստանում, քաջածանոթ է հայկական մշակույթին ու պատմությանը: Համենայնդեպս, դա են պնդում նրա հայաստանցի ծանոթներն ու ընկերները: Պաշտոնական փաստաթղթերը, սակայն, փաստում են՝ Ալան Անդրանիկ Գոգբաշյանը 2001 թվականին ստացել է անգամ Հայաստանում կեցության հատուկ կարգավիճակ: Միացյալ Թագավորության դեսպանատունը առայժմ այս տեղեկությունները չի հաստատում, բայց և չի հերքում․ դիվանագիտական առաքելությունում դեռ սպասում են նոր ղեկավարի հետ հանդիպմանը: Միացյալ Թագավորության արտաքին քաղաքական գերատեսչությունում Գոգբաշյանն աշխատանքի է անցել 2008-ից, և երեք տարի անց արդեն ստանձնել Մարոկոյում Միացյալ Թագավորության փոխդեսպանի պաշտոնը, այդուհետ ղեկավարել մի քանի դեպարտամենտներ, աշխատել այն երկրների հետ, որոնք անցումային փուլում են գտնվել: Քաղաքագետ Ստեփան Գրիգորյանի համոզմամբ, Հայաստանում նրան դեսպան նշանակելիս առաջնային դեր է խաղացել հենց այդ փորձառությունը․ «Ես կարծում եմ՝ իրան ստեղ նշանակեցին հենց էն պատճառով, որ մեր երկիրը նման է այդ երկրներին, քանի որ այդ երկրները բավական ծանր անցումային փուլ են անցել։ Շատերը շարունակում են այդ անցումային փուլը, մենք անցնում ենք կոմունիստական կամ սոցիալիստական համակարգերից դեպի ազատ շուկայական համակարգ, ժողովրդավարություն, էն երկրները ապագաղութացման ճանապարհով էին դեպի ազատ դեմոկրատական երկրներ։ Իմ կարծիքով՝ էդ իրա փորձը իրանք ուզում են ստեղ օգտագործել»։ Հայաստանում Միացյալ Թագավորության դեսպանատնից «Ազատությանը» փոխանցեցին՝ Մեծ Բրիտանիայի առաջնային խնդիրն է աջակցել Հայաստանին, որպեսզի այն ամրապնդվի՝ որպես ժողովրդավարական, բարգավաճ և ամուր երկիր: Դեսպանատան հաղորդագրությունն ընդգծում է, որ թավշյա հեղափոխությունից հետո Միացյալ Թագավորությունը ավելացրել է աջակցությունը Հայաստանի ներքին բարեփոխումներին․ «Մենք աջակցեցիք անցած դեկտեմբերին կայացած ազատ և արդար ընտրություններին, այժմ էլ մեր աջակցությունը կենտրոնացնում ենք հայաստանյան ինստիտուտների հզորացման վրա, ինչը առանցքային նշանակություն ունի Հայաստանի երկարատև զարգացման համար», - փոխանցում է Բրիտանական դեսպանատունը հավելելով՝ ի թիվս այլ ծրագրերի, Միացյալ Թագավորությունը աջակցում է հայաստանյան նորընտիր խորհրդարանին, զինված ուժերին ու կրթական համակարգին: Վերջին տարիներին աշխուժացել են նաև հայ-բրիտանական տնտեսական կապերը, 2017-ին առևտրաշրջանառությունն աճել է 42 տոկսով, 2018-ին՝ 17: «Հայաստանում Բրիտանիայի դեսպանատունը էլ ավելի մեծ աճի ներուժ է տեսնում, և մեքն աշխատում ենք բրիտանական ընկերությունների և հայաստանյան ոլորտների հետ՝ քաջալերելու ավելի մեծ բրիտանական առևտուր և ներդրումներ», - «Ազատությանը» փոխանցել է Հայաստանում Մեծ Բրիտանիայի դեսպանատունը, հավելելով՝ հաշվի առնելով այդ ջանքերը, ինչպես նաև մեծ աջակցությունը Հայաստանի կառավարությանը՝ արդյունավետ բիզնես միջավայր ստեղծելու հարցում, «մենք լավատես ենք, որ Հայաստանի և Բրիտանիայի միջև ատևտրատնտեսական կապերը էլ ավելի կամրապնդվեն»: Քաղաքագետ Ստեփան Գրիգորյանի համոզմամբ, դրան կարող է նպաստել նաև Մեծ Բրիտանիայի ապահարզանը Եվրամիությունից․ «Այդ կապերը, որ Եվրամիության հետ հիմա իրանք խզում են, դա լուրջ հետևանքների կբերի տնտեսական ոլորտում։ Հիմա առանձին Հայաստանի էդ իմաստով էդքան հետաքրքիր չի, ես ասեցի՝ այլ հարցերով մենք հետաքրքիր ենք՝ ռեգիոնալ մեր տեղը, մեր դիրքը աշխարհի, բայց տնտեսականը՝ մեր շուկան փոքր է։ Բայց ԵԱՏՄ-ի շուկայի կոնտեքստով կարող ենք ինչ-որ հետաքրքրություն առաջացնել»։ Ի դեպ, նորանշանակ դեսպան Ալան Անդրանիկ Գոգբաշյանը մինչ Հայաստան ուղևորվելը ուղիղ մեկ տարի Միացյալ Թագավորության արտաքին քաղաքական գերատեսչությունում ռուսաց լեզվի դասընթացներ է անցել: Ըստ պաշտոնական հաղորդագրության, նա Հայաստանում դիվանագիտական առաքելությունը կսկսի մի քանի շաբաթից՝ այդ պաշտոնում փոխարինելով տիկին Ջուդիթ Ֆարնուորթին։

Related news

Latest News
Hashtags:   

Սեպտեմբերից

 | 

Հայաստանում

 | 

Բրիտանիայի

 | 

դեսպանը

 | 

կլինի

 | 

հայազգի

 | 

Անդրանիկ

 | 

Գոգբաշյանը

 | 
Most Popular (6 hours)

Most Popular (24 hours)

Most Popular (a week)

Sources