Thursday 18 July 2019
Home      All news      Contact us      English
tert.am - 7 days ago

Արսեն Թորոսյանի ներկայացրած նախագիծը հանվեց կառավարության օրակարգից. Փաշինյանն ասաց, որ փաստարկներ չկան, ծրագիրը խաբելու է մարդկանց

Առողջապահության նախարար Արսեն Թորոսյանի ներկայացրած նախագիծն այսօր հանվեց Կառավարության նիստի օրակարգից: Նախարարը ներկայացրեց փոփոխություններ կատարելու նախագիծ, որը վերաբերում էր անպտղության բուժման և հաղթահարման նպատակով պետության կողմից երաշխավորված անվճար պայմաններով հետազոտությունների բուժման ծավալներին, որից օգտվելու իրավունք ունեն երկու տարի և ավել անպտղություն ունեցող անզավակ զույգերը, երբ ամուսիններից մեկը զինծառայող է, ընտանեկան նպաստի համակարգում ընդգրկված նպաստառուներ, սահմանամերձ համայնքում բնակվող զույգեր և այլն: Վարչապետ Նիկոլ Փաշինյանը հարցրեց՝ այս որոշմամբ մենք ի՞նչ ենք փոխում մարդկանց կյանքում: Ի պատասխան՝ Արսեն Թորոսյանն ասաց, որ ծրագիրը նոր է, մինչև հիմա չի եղել, ընդհատվել է, ուստի շահառուների թիվն են հստակեցնում, որ իմանան, թե ով կարող է օգտվել: Նիկոլ Փաշինյանն ասաց, թե հարց է ծագում՝ կառավարության որոշման մեջ ներկայացված շրջանակի բոլոր շահառուները կարողանալո՞ւ են օգտվել ծրագրից, թե գումարն ավարտվելու է, մարդկանց ասելու ենք՝ չէ : Արսեն Թորոսյանը պատասխանեց, թե լինելու է հերթագրում, բացի այդ, նախապայմանները շատ են, բոլոր ցանկացողները չեն, որ համապատասխանելու են չափանիշներին: Նիկոլ Փաշինյանն արձագանքեց այսպես. Պարզ է, որ ոչ բոլոր անպտղությամբ տառապող զույգերն են, որ այս ծրագրի շահառու են: Կան որոշակի սոցիալական խմբեր, որոնց վերաբերում է: Հարցն այն է, թե Ձեր նշած շրջանակի բոլոր շահառուներին մենք կարողանալո՞ւ են սպասարկել, թե ոչ : Նախարարն ասաց, թե նույն տարվա մեջ բոլորին սպասարկել չեն կարողանալու. Տարեկան առնվազն 85 զույգի կարողանալու ենք սպասարկել : Նիկոլ Փաշինյանն ասաց, թե դա պոտենցիալ շահառուների չնչին մասն է: Պետք է հստակ ասենք, որ սա դեռևս Այս որոշմամբ հատկացված գումարի ծախսման մեխանիզմն ենք որոշում, էլի մարդիկ հերթագրվելու են, բայց ի՞նչ սկզբունքով, ով է որոշելու՝ ով է առաջինը, ով՝ 4-րդը: Այս ծրագիրը նախկինում հենց այս պատճառով է ընդհատվել: 200 մլն հատկացնում ենք, բայց շահառուների շրջանակը լայն է, ու ո՞նց են մարդիկ հայտնվելու այս ցուցակում՝ ծանոթո՞վ, բարեկամո՞վ ,- հավելեց Նիկոլ Փաշինյանը: Արսեն Թորոսյանն ասաց, որ այս ծրագիրը կարող է բազմաթիվ ընտանիքների պարգևել երեխա՝ անկախ նրանից, որ դրանք չլինեն բոլոր ընտանիքները, ովքեր ուզում են երեխա: Թորոսյանն ասաց, որ զույգերը, որոնք համապատասխանում են այս չափանիշներին, չեն լինելու հազարավորները, լինելու են հարյուրավորները, որոնք սպասարկվելու են՝ ըստ դիմելու ժամանակահատվածի: Նիկոլ Փաշինյանը շարունակեց հստակեցնել, որ որոշման մասին իմանալով՝ մարդիկ հազարներով դիմելու են ծրագրից օգտվելու համար, ու մարդկանց պետք է բացատրել՝ ի սկզբանե ո՞ւմ վրա է տարածվելու, որ վերջում իրեն խաբված չզգա: Փաշինյանը նաև հարցրեց՝ պոտենցիալ շահառուների թիվը որքա՞ն է: Թորոսյանն ասաց, որ կա անպտղության տոկոս, բայց բոլորը չէ, որ ունեն այս տեխնոլոգիաների կարիքը: Վարչապետը հարցրեց նորից՝ այս ծրագրի պոտենցիալ շահառուների թիվը կա՞: Արսեն Թորոսյանը պատասխանեց, որ չկա: Բա ինչո՞ւ ենք սենց որոշում կայացնում ,- հարցրեց Նիկոլ Փաշինյանը: Արսեն Թորոսյանն ասաց, որ սահմանափակ է ֆինանսավորումը: Դուք ասում եք՝ տարեկան 80 զույգի ենք սպասարկում: 700 զույգից ո՞նց է որոշվում, թե որ 80 զույգն են սպասարկվում: Սա լինելու է ծանոթ-խնամի-բարեկամ միջոցով, ով ում հետ ավելի մոտիկ է, ով ավելի արագ կարում է հասնի: Ծանոթի մեխանիզմով է աշխատելու: Բացատրեք այն մեխանիզմը, որը հազար շահառուից ընտրելու է 80-ին ,- շեշտեց Նիկոլ Փաշինյանը: Վարչապետն ասաց, որ նախարարությունը չունի հստակ գնահատական, թե իրենց սահմանած չափանիշներով քանիսն են, որ ունեն անպտղության խնդիրներ. Կարող է լինել վարկած, որ նման զույգերի թիվը 4000 է, որոնց ասում ենք, թե ձեզնից 80-ին ենք սպասարկելու, բայց ո՞նց ենք ընտրելու, ծանոթո՞վ : Փաշինյանը նշեց, որ որոշվելու է կոռուպցիայով, ծանոթով կամ բարեկամով : Արսեն Թորոսյանն ասաց, որ 4000 շահառուի մասին խոսք լինել չի կարող, խոսքը մի քանի հարյուր հոգու մասին է, իսկ տվյալներ չկան, որովհետև նախկինում ծրագիր չի եղել, որին դիմեն: Եթե ինչ-որ մեկը գալիս է լեղապարկի քարի հեռացման համար, ու չկա սահմանված բյուջե, մարդը հերթագրվում է, ու դա արվում է էլեկտրոնային համակարգի միջոցով, ու ես կարող եմ նայել, թե ովքեր են հերթագրված պլանային վիրահատումների համար: Նույնը լինելու է այս դեպքում: Գումար չի վատնվելու, լինելու է բժշկական ստատիստիկա, եթե երկու անգամ չի ստացվում՝ երրորդ անգամ չի ստացվելու ,- ասաց Արսեն Թորոսյանը: Ֆինանսների նախարար Ատոմ Ջանջուղազյանն էլ նկատեց, թե պարզ չէ՝ ինչ նպատակ է հետապնդվում կառավարությունն այս որոշմամբ, որովհետև ընտրությունը կատարվելու է՝ ելնելով սոցիալական բնույթից: Կառավարության մասնակցությունն այստեղ ո՞րն է: Եթե մենք հիմա սոցիալական խումբ պետք է քննարկենք, թե ում համար է այս ծառայությունը, դա բուժծառայության հետ կապ չունի: Սկզբից պետք է գնահատել՝ սրա կարիքը սոցիալական տեսակետից կա՞, թե ոչ, կառավարությունը պե՞տք է վերցնի իր վրա այս չափով ծրագիրը՝ անորոշության նման չափով ,- ասաց Ջանջուղազյանը: Թորոսյանը հակադարձեց, որ եթե ծրագիրն անիմաստ էր, ապա չպետք է ներառվեր բյուջե : Նա ասաց, որ ամեն ինչ անորոշ չէ, շրջանակն էլ վաղուց որոշված է եղել: Նիկոլ Փաշինյանը շարունակեց պնդել, թե պարզ չէ՝ ինչպես է որոշվելու հերթականությունը, ովքեր են շահառուները: Մենք մարդուն հույս ենք տալիս, մարդը 36 տարեկան է, հաշվառվում է, հերթը հասնում է, երբ 40 տարեկան է ու դուրս է թռնում շահառուների շրջանակից: Բա խաբելը էլ ո՞նց ա լինում: Եթե ծրագիր ենք անում, մարդը 2 տարուց ծրագրին մասնակցելու շանսը կորցնելու է, ճիշտ է՝ 30 տարեկանը առաջինը սպասարկվի, վերջին շանսը օգտագործի, քան թե ասենք, թե ծրագիրը 26 տարեկանի հետ ենք անում, քո տարիքն էլ կանցնի ,- ասաց Նիկոլ Փաշինյանը: Արսեն Թորոսյանն ասաց, որ գուցե 26 տարեկանի մոտ ավելի արդյունավետ լինի ծախսը, քան՝ 36-ի: Փաշինյանն ասաց. Մարդը այսօր լուրերով լսում է, թե պետությունն իրեն շանս է տալու, գնալու է, որ դիմի, ասելու են՝ 2022-ին արի, բայց ինքն էդ ժամանակ էլ շահառու չի լինելու: Պետք է փաստարկների դաշտում գործել: Էս հարցերը կքննարկեք, կբերեք, կլուծենք, հիմա օրակարգից հանվում է հարցը :

Related news

Latest News
Hashtags:   

Արսեն

 | 

Թորոսյանի

 | 

ներկայացրած

 | 

նախագիծը

 | 

հանվեց

 | 

կառավարության

 | 

օրակարգից

 | 

Փաշինյանն

 | 

փաստարկներ

 | 

ծրագիրը

 | 

խաբելու

 | 

մարդկանց

 | 
Most Popular (6 hours)

Most Popular (24 hours)

Most Popular (a week)

Sources