Monday 22 July 2019
Home      All news      Contact us      English
tert.am - 1 month ago

ՍԴ դատավորը չպետք է լինի խոցելի, Վահե Գրիգորյանի թեկնածությունը 2-րդ անգամ առաջադրելով օրենք է անտեսվել. խմբակցությունների ելույթները

Ազգային ժողովում այսօր՝ ՍԴ դատավորի ընտրության հարցի քննարկման ժամանակ, ԱԺ խմբակցությունների անունից հնչեցին ելույթներ։ Լուսավոր Հայաստան խմբակցությունը հայտարարեց, որ Վահե Գրիգորյանի թեկնածությունը երկրորդ անգամ առաջադրելով օրենք է անտեսվել, Բարգավաճ Հայաստան -ը նշեց, որ ՍԴ դատավորը ոչ մի դեպքում չպետք է լինի խոցելի, իսկ Իմ քայլից հայտարարեցին, որ առաջադրված թեկնածուն իշխանության թեկնածուն է։

ԼՀԿ-ի անունից ելույթով հանդես եկավ պատգամավոր Տարոն Սիմոնյանը, ով նշեց, որ վերացարկվելով բոլոր թեկնածուների անձերից, պետք է ինստիտուցիոնալ մտածել։ Ըստ նրա՝ Վահե Գրիգորյանի թեկնածությունը երկրորդ անգամ առաջադրելով օրենք է անտեսվել։ Եթե ցանկանում ենք մեր ընդգծված ցանկալի թեկնածուին ընտրեն ինչ-որ պաշտոնում, պետք է խիստ հաշվարկով մոտենանք՝ հասկանալով, որ դատական համակարգն այլ համակարգ է, ՍԴ-ի համար առաջադրվող պահանջներն այլ պահանջներ են ,- ասաց նա։ Տարոն Սիմոնյանը նշեց, թե բազմիցս նշել են, որ օրենսդրական խնդիր կա և հստակ պահանջ կար այդ հարցով, մինչդեռ նրանց պատասխանել են, թե այս պահանջը չի խախտվում Վահե Գրիգորյանի առաջադրումով, հետո ասեցին, որ այո պահանջ կա, բայց հակասահմանադրական է։

Եթե տեսնում էինք խնդիր կա, քաղաքական մեծամասնություն եք, կարող էիք օրենքում փոփոխություն կատարել, բայց առանց դրա քաղաքական որոշման եք գնացել, որը լավ ճանապարհ չէր։ Բոլոր տարբերակներից ընտրվել է վատագույնը, և ինչքան էլ պարոն Գրիգորյանի մասնագիտական ունակությունները, նրա անձը և ունեցած փորձը գնահատենք, չենք կարող անտեսել օրենքի պահանջը ,- ասաց նա և հավելեց, որ վաղվա իրավական պետությունը պետք է անցնի օրենսդրական ճանապարհով։

Դուք ունեիք հնարավորություն այլ ճանապարհով գնալու և մենք էլ դա կողջունեինք, բայց չարեցիք ,-ասաց նա։ ԲՀԿ-ի անունից խոսեց խմբակցության քարտուղար Արման Աբովյանը, ով նշեց, որ ՍԴ դատավորը ոչ մի դեպքում չպետք է լինի խոցելի։ Որովհետև վաղը երբ ինչ-որ հարցեր լինեն, երբ որոշակի որոշումներ ընդունվեն, չպետք է ոչ մի դեպքում թույլ տանք, որ այն մարդը, որ մասնակցում է որոշումներ կայացնելուն, լինի խոցելի ,-ասաց նա։ Արման Աբովյանն ասաց, որ, այո, պնդում են, որ քաղաքական կոմպոնենտ դատավորի որոշման մեջ չպետք է լինի, պետք է լինի օրենքի գերակայություն։ Ով ուզում է լինի, երբ ուզում է լինի, ինչ կարգով ուզում է լինի, մենք միշտ ունենալու ենք հարցեր, միշտ կասկածի տակ ենք դնելու յուրաքանչյուր, նույնիսկ ամենափայլուն թեկնածուին, ոչ թե այն պատճառով, որ փորձում ենք դիվիդենտներ քաղել, այլ այն րոպեից, երբ հարցերը կվերջանան, ուրեմն ՀՀ-ում քաղաքականությունը կվերջանա ,-ասաց նա։

Իմ քայլը խմբակցության անունից ելույթ ունեցավ Ալեն Սիմոնյանը, որն անդրադարձավ Տարոն Սիմոնյանի հայտարարությանը և նշեց, որ այո ճշմարտությունը թանկ է, բայց ճշմարիտ խոսք չլսեց։

Օրենքը հստակ ֆիքսում է այն դեպքերը, երբ նույն մարդը չի կարող երկրորդ և ավելի անգամ ներկայացվել կամ հավակնել պաշտոնին և մեկնաբանություն տալ և ծռմռվել քաղաքական նպատակահարմարությունից ելնելով և դա այս ամբիոնից հնչեցնել մշտապես կարելի է։ Դրա վառ օրինակն է, Սահմանադրության մեջ նախագահին վերաբերող կետը, որ նույն մարդը չի կարող երկու անգամից ավել առաջադրվել նախագահի պաշտոնում, դրա համար Սահմանադրություն էր փոխում, էն էլ չստացվեց, ուստի ուզում եմ մեկնաբանությունների դաշտում մանիպուլյացիաների փորձ չանել, որովհետև խոսքը վերաբերում է նոր առաջադրմանը, իսկ Վահե Գրիգորյանից առաջ մենք ունեցել ենք ևս երկու նոր թեկնածուներ։ Այսինքն՝ այս մասով չեմ կիսում, պարո՛ն Սիմոնյան, Ձեր՝ օրենքի մեկնաբանությունը ,-ասաց նա։ Ալեն Սիմոնյանը նշեց, թե ասում են, որ Վահե Գրիգորյանն իշխանության թեկնածուն է։ Բա ո՞ւմ թեկնածուն պետք է լիներ, մենք վստահության քվե ենք ստացել, որը պատասխանատվություն է նաև, մենք այդ պատասխանատվությունը վերցնում ենք մեր վրա ,-ասաց նա։ Ալեն Սիմոնյանն անդրադարձավ նաև ԲՀԿ-ական պատգամավոր Գևորգ Պետրոսյանի ելույթին՝ նշելով, որ իր կարծիքով, որը գուցե հիմնավոր չէ՝ կա ԲՀԿ և առանձին Գևորգ Պետրոսյան։ Այո՛, գուցե ձեր մոտ կասկած չկար, որ ՀՀ-ում մեծ լեգիտիմության խնդիր կար, ինքնահռչակ նախագահներ են եղել ,- ասաց նա և կոչ արեց ընտրել ըստ խղճի, ըստ Վահե Գրիգորյանի անցած ճանապարհի։

Related news

Latest News
Hashtags:   

դատավորը

 | 

չպետք

 | 

խոցելի

 | 

Գրիգորյանի

 | 

թեկնածությունը

 | 

անգամ

 | 

առաջադրելով

 | 

օրենք

 | 

անտեսվել

 | 

խմբակցությունների

 | 

ելույթները

 | 
Most Popular (6 hours)

Most Popular (24 hours)

Most Popular (a week)

Sources