Saturday 15 December 2018
Home      All news      Contact us      English
azatutyun - 12 days ago

Վերաքննիչ դատարանում ավարտվեց Քոչարյանի պաշտպանական թիմի բողոքի ներկայացումը

Վերաքննիչ դատարանում ավարտվեց ՀՀ երկրորդ նախագահ Ռոբերտ Քոչարյանի պաշտպանական թիմի բողոքի ներկայացումը, առարկություններով հանդես եկավ մեղադրական կողմը։ Վերաքննիչ դատարանը շարունակում է Սահմանադրական կարգի տապալման մեջ մեղադրվող Հայաստանի երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ բողոքի քննությունը: Ըստ Քոչարյանի փաստաբան Հայկ Ալումյանի՝ մեղադրական կողմից մոտ 40 րոպե հանդես է եկել գլխավոր դատախազը՝ Արթուր Դավթյանը։ «Գլխավոր դատախազի ասածի տրամաբանությունը, եթե փորձեմ կարճ ներկայացնել, ինքը գտնում է, որ անձեռնմխելիությունը անհամատեղելի է օրենքի խախտման հետ, այսինքն, եթե որևէ մեկին վերագրում է օրենքի խախտում, տվյալ դեպքում Հանրապետության նախագահին, և եթե այդ օրենքի խախտումը իր լիազորությունների մեջ չի մտնում, ինքն անձեռնմխելի չէ», -ասաց Ալումյանը։ Քոչարյանի պաշտպանները իրենց բողոքներից մեկով պնդում են, որ նախկին նախագահը չպետք է կալանավորվի քանի դեռ չի որոշվել, որ նա անձեռնմխելի չէ, քանի դեռ չեն հաստատվել հիմնավոր կասկածները, որ նա կատարել է իրեն մեղսագրվող արարքը: Բացի այդ, ըստ պաշտպանների, պետք է քննարկվի՝ արդյոք մնալով ազատության մեջ նա կարող է խոչընդոտել քննությանը: Բողոքը ներկայացնելիս Քոչարյանը ևս ելույթ է ունեցել։ Պաշտպանը փոխանցեց, որ Քոչարյանը նկարագրել է իրավիճակը: - «Նկարագրվեց, թե ինչ էր կատարվում, ինչ մտահոգություններ կային, ինչ պայմաններում և ինչ ելակետային տվյալների հիման վրա է արտակարգ դրություն մտցվել», - մանրամասնեց Հայկ Ալումյանը: - «Տեսանյութ կա, որը մենք ներկայացրել ենք Վճռաբեկ դատարանում, որ ցուցարարների կողմից կա մեկը, ով կրակում է ոստիկանական ուժերի ուղղությամբ, և մի քանի նյութեր որոնք նախաքննական գաղտնիք են համարվում», - ասաց նա: Քոչարյանի պաշտպաններից Արամ Օրբելյանն էլ ակնարկեց, որ Սահմանադրական դատարան դիմելու համար որոշակի տեխնիկական խնդիրներ կան, սակայն ընդգծեց՝ բոլոր հնարավոր իրավական գործիքները օգտագործելու են: Հայաստանի նախկին նախագահը «Մարտի 1»-ի գործով մեղադրվում է մի խումբ անձանց հետ սահմանադրական կարգը տապալելու մեջ: Հուլիսի 27-ին Երևանի ընդհանուր իրավասության դատարանը նրա նկատմամբ խափանման միջոց էր ընտրել երկամսյա կալանավորումը: Օգոստոսի 13-ին, սակայն, Վերաքննիչ դատարանը վերացրել էր առաջին ատյանի այդ որոշումը՝ Սահմանադրությամբ նախագահին տրված անձեռնմխելիության հիմքով: Քոչարյանի խափանման միջոցը վերացնելու՝ Վերաքննիչ դատարանի որոշումը բողոքարկելու համար վճռաբեկ ատյան էին դիմել թե՛ Ռոբերտ Քոչարյանի պաշտպանները, և թե՛ գլխավոր դատախազ Արթուր Դավթյանը։

Related news

Latest News
Hashtags:   

Վերաքննիչ

 | 

դատարանում

 | 

ավարտվեց

 | 

Քոչարյանի

 | 

պաշտպանական

 | 

բողոքի

 | 

ներկայացումը

 | 
Most Popular (6 hours)

Most Popular (24 hours)

Most Popular (a week)

Sources