Thursday 13 December 2018
Home      All news      Contact us      English
azatutyun - 24 days ago

«Բելառուսի և Ղազախստանի հետ լարումը ձեռնտու չէ մեր հետագա քաղաքական քայլերի համար». Վահրամ Բաղդասարյան

Բելառուսի և Ղազախստանի հետ լարումը ձեռնտու չէ Հայաստանի հետագա քաղաքական քայլերի համար։ Այդ մասին այսօր Ազգային ժողովում հարցուպատասխանի ժամանակ «Ազատության» հարցին ի պատասխան ասաց Հանրապետական խմբակցության ղեկավար Վահրամ Բաղդասարյանը։ Ըստ Բաղդասարյանի, սա կարող է հղի լինել բավականին տհաճ հետևանքներով։ Բաղդասարյան. - Ի սկզբանե պետք է ասեմ, որ միջազգային հարթակներում և ընդհանրապես, նման հռետորաբանությունն ընդունելի չէ, առավել ևս դաշնակից և բարեկամ երկրների միջև, քանի որ ՀԱՊԿ-ը մի մեծ ընտանիք է, և ամբողջ աշխարհն է դիտում։ Ինձ թվում է, որ դա ընդունելի հռետորաբանություն չէ։ Ի սկզբանե բացթողումներ եղել են նաև մեր իշխանությունների կողմից առաջին հերթին և մենք դրա մասին զգուշացրել էինք, որ Խաչատուրովը ՀԱՊԿ երկրների համաձայնությամբ նշանակված անձ էր, և երբ որ նրա նկատմամբ պետք է քրեական հետապնդում լիներ և գործ հարուցվեր, և պետք է կալանավորվեր, այդ ժամանակ, նախապես էթիկայի նորմերից ելնելով, և ընդհանրապես պետք է տեղյակ պահվեր ՀԱՊԿ երկրների ղեկավարներին։ Այդ գործը չի կատարվել և լարումը, սրումն այդտեղից առաջացավ, և արդեն կանխատեսելի էր, որ մենք կորցնելու ենք այդ տեղը, որովհետև դրա սինդրոմներն արդեն կային, հետևությունները կային նրանց հռետորաբանության, ելույթների միջև։ Այս լարումը ձեռնտու չէ, մեր հետագա քաղաքական քայլերի համար։ Սա կարող է հղի լինել բավականին տհաճ հետևանքներով։ «Ազատություն». - Համաձա՞յն եք, որ ինչպես Փաշինյանը նշեց, որ Բելառուսն ու Ղազախստանը պետք է բացատրություններ տան, թե ինչու են, օրինակ, Բելառուսի դեպքում ՀԱՊԿ անդամ չհանդիսացող երկրի դեսպանի հետ քննարկում փակ դռների հետևում տեղի ունեցած բանակցությունները, որոնք կարող են լուրջ անվտանգային խնդիրներ առաջ բերել, օրինակ, Հայաստանի համար։ Բաղդասարյան. - Բնականաբար մեզ համար ցանկալի չէ, երբ որ նման փակ հանդիպումից հետո հանկարծ հայտնվում է Ադրբեջանի դեսպանը և նման քննարկում է կատարվում, բայց դա կախված է նրանից, թե ինչ պայմանավորվածություն է ձեռք բերվել փակ հանդիպման ժամանակ և ով է խախտել պայմանավորվածությունը։ Ինձ թվում է, որ ևս մեկ անգամ  հանդիպման ժամանակ կպարզաբանեն, և բոլորը հանդես կգան հայտարարությամբ և ավելի պարզաբանումներ կմտցվի։ Համենայն դեպս մենք պետք է ֆիքսենք, որ Ադրբեջանը ՀԱՊԿ-ի հետ որևէ առնչություն չունի։ Չգիտեմ, թե ում բարեկամ երկիրն է, կամ ում ընկերն է Ալիևը, բայց ՀԱՊԿ-ի հետ ինքը որևէ առնչություն չունի։ «Ազատություն». - Դուք ընդունո՞ւմ եք, որ նաև ձեր իշխանության օրոք ՀԱՊԿ-ում նույնպես կար այդ խնդիրը, որ անվտանգային համակարգում գտնվող նույն երկրները, տվյալ դեպքում Բելառուսը և Ղազախստանը, գործում են ի շահ Ադրբեջանի և ընդդեմ Հայաստանի։ Բաղդասարյան. - Եղել են նման զգացողություններ, համենայն դեպս որևէ մեկ անգամ մեր իշխանության օրոք նման սկանդալներ չեն եղել, որովհետև դա դիվանագիտական բանակցություններ արդյունքում պետք է հարթվեն ոչ թե մասսայական՝ ամբողջ աշխարհի աչքի առջև պետք է այդ վիճաբանությունները լինեն։ Այսինքն՝ դա արդեն իսկ խարխլում  է բարեկամ և ընտանիք հասկացողությունը, որ ՀԱՊԿ-ը մեծ ընտանիք է և բարեկամ երկրներ են։ Բնականաբար, եղել են շատ կոշտ խոսակցություններ, բայց դա եղել է առանձնազրույցներով և դա հարթվել է կարծես, և նմանատիպ ցայտուն երևույթներ մեր իշխանության ժամանակ չի եղել, և կարծես թե մենք որևէ մեկ անգամ չենք ունեցել մի դեպք, որ պարտվողական դիրքորոշում արձանագրած լինենք ՀԱՊԿ-ի հետ բանակցությունների ժամանակ։ «Ազատություն» - Հիմա կա՞ այդ պարտվողական դիրքորոշումը։ Բաղդասարյան. - Հետևենք զարգացումներին։ Բելառուսի նախագահ Ալեքսանդր Լուկաշենկոն ՀԱՊԿ Հավաքական անվտանգության խորհրդի դռնփակ նիստից հետո Բելառուսում Ադրբեջանի դեսպանին պատմել է դռնփակ ֆորմատում տեղի ունեցած նիստի մասին: Հայաստանի վարչապետի պաշտոնակատար Նիկոլ Փաշինյանը, արձագանքելով Լուկաշենկոյի այս քայլին, հայտարարել է. - «Ես զարմացած եմ, որ 30 տարի կամ չգիտեմ քանի տարի պետության ղեկավարի կարգավիճակում եղած մարդը կարող է իրեն այդպիսի քայլ թույլ տալ: Ես, իհարկե, պետք է պարզաբանումներ պահանջեմ Բելառուսի նախագահից և ոչ միայն Բելառուսի նախագահից», - ասել է Փաշինյանը՝ նշելով, որ պայմանավորվածություններին հակասող հայտարարություն է արել նաև Ղազախստանի նախագահ Նուրսուլթան Նազարբաևը՝ ՀԱՊԿ գագաթնաժողովի դռնփակ նիստից հետո հայտարարելով, որ ՀԱՊԿ գլխավոր քարտուղարի պաշտոնում նշանակվելու է Բելառուսի ներկայացուցիչը: «Որևէ մեկը նման հայտարարություն անելու իրավունք չուներ, որովհետև ՀԱՊԿ-ում որոշումները կայացվում են կոնսենսուսով, իսկ մենք մեր դիրքորոշումը հստակ արտահայտել ենք. քանի դեռ մենք գործընկերային միջավայրում այլ որոշում չենք կայացրել, որևէ մեկը նման հայտարարություն անելու իրավունք չունի», - ասել է Փաշինյանը: Նշենք, որ ՀԱՊԿ գլխավոր քարտուղարի պաշտոնը թափուր է նոյեմբերի 2-ից։ Մինչ այդ այն զբաղեցնում էր Հայաստանի Զինված ուժերի գլխավոր շտաբի նախկին պետ Յուրի Խաչատուրովը, որին Երևանը վաղաժամ ետ կանչեց «Մարտի 1»-ի գործով մեղադրանք ներկայացնելուց հետո։ Նոյեմբերի 8-ին Աստանայում կայացած գագաթնաժողովում կազմակերպության անդամ երկրները այդպես էլ նոր գլխավոր քարտուղարի հարցում ընդհանուր հայտարարի չեկան և որոշեցինքննարկումները շարունակել դեկտեմբերի 6-ին Սանկտ Պետերբուգում կայանալիք հանդիպման ընթացքում։

Related news

Latest News
Hashtags:   

Բելառուսի

 | 

Ղազախստանի

 | 

լարումը

 | 

ձեռնտու

 | 

հետագա

 | 

քաղաքական

 | 

քայլերի

 | 

համար

 | 

Վահրամ

 | 

Բաղդասարյան

 | 
Most Popular (6 hours)

Most Popular (24 hours)

Most Popular (a week)

Sources