Wednesday 23 September 2020
Home      All news      Contact us      English
tert.am - 2 month ago

Փաշինյանը շարունակում է վարկաբեկել ներգաղթի գաղափարը. ինչո՞ւ ազատվեցին Սփյուռքի հանձնակատարի գրասենյակի 10 աշխատակիցները

Օրերս Նիկոլ Փաշինյանն աշխատանքից ազատեց Սփյուռքի հանձնակատարի գրասենյակի միանգամից 10 աշխատակցի։ Ու կարևորն այն չէ նրանց որոշ մասին հետո այլ հաստիքով գործի կընդունի՞, թե՞ ոչ։ Կարևորն անգամ այն չէ, որ դա, գուցե, տեղի է ունեցել հանձնակատարի գրասենյակում օպտիմալացման ծրագիր իրականացնելու շրջանակում, վարչություններ ու բաժիններ են վերակազմակերպվել կամ, միգուցե այլ պատճառներով։ Նույնիսկ կարևոր չէ, թե ինչո՞ւ Փաշինյանն այդ որոշումը կայացրեց այն ժամանակ, երբ հանձնակատար Սինանյանը Հայաստանում չէր, կամ արդյոք կարիքը կա՞ր բոլորին միանգամից ազատելու։ Փաստն այն է, որ վարչապետը ցանկանում էր դրանով ի ցույց դնել, որ ինքը դժգոհ է այդ կառույցի գործունեությունից ու կտրուկ քայլ է արել այդ պատճառով։ Բայց, եթե հանրությունը դժգոհ է, հասկանալի է՝ Փաշինյանից, իսկ Փաշինյանն ումի՞ց է դժգոհ։ Մի վարչապետ, որ հեղափոխությունից անմիջապես հետո հայտարարեց, որ պետք է տեղի ունենա մասշտաբային ներգաղթ, ու իշխանություններն ամեն ինչ անում են, որ դա հավուր պատշաճի կազմակերպվի, դրանից հետո ո՞վ էր սփյուռքի նախարարությունը լուծարում ու դրա փոխարեն ինչ որ հանձնակատարի ինստիտուտ հիմնում։ Հարցն այն չէ, թե քանի աշխատակից ունեիր ու քանիսն ունես հիմա, գուցե միայն ձևականորեն անունն է փոխվել, իսկ կառուցվածքը հիմնականում պահպանվել։ Հարցն այն է, որ նախարարությունը քաղաքականություն մշակող ու իրականացնող մարմին է, իսկ լայնածավալ ներգաղթի համար իսկապես պետք է քաղաքականություն մշակել, ու կառույցի ղեկավարն էլ կառավարության անդամ պիտի լինի, որ գործընկերների հետ հավասարը հավասարի պես համալիր ու համակարգված ձևով իրականացնեն այդ ներգաղթը։ Հարկավոր են պատշաճ բնակության վայրեր, բավարար աշխատատեղեր, բարենպաստ բիզնես միջավայր, որպեսզի նոր աշխատատեղեր ստեղծվեն, ապրելու ու արարելու նորմալ մթնոլորտ, հաշվի առնելով, որ աշխարհի տարբեր կողմերից Հայաստան են գալու մարդիկ, որոնց ադապտացվելու համար լուրջ խնդիրներ պետք է լուծվեն։ Իսկ Սփյուռքի հանձնակատարի հենց անունն է հուշում, որ դա նրա ֆունկցիան չէ, նա ընդամենը հանձնակատար է։ Բացի այդ, ինչո՞ւ պետք է Սփյուռքի հանձնակատարը լինի Գլենդելից։ Փաշինյանը չգիտի՞, որ տարիների ընթացքում սփյուռքի բնույթն էլ է փոխվել, աշխարհի տարբեր երկրների գաղթօջախների ազդեցությունները, Հայաստանի հետ շփումների կապի որակը, հայաստանից արտագաղթածների տեսակակար կշիռը ընդհանուր սփյուռքահայերի մեջ։ Ավելին, Սինանյանը սփյուռքի ավանդական երեք կուսակցություններից մեկի անդամ է,։ Փաստորեն Դաշնակցությունը Հայաստանում կոշտ ընդդիմադիր է, իսկ Զարեհ Սինանյանը կոշտ նիկոլական։ Դրա պատճառով սփյուռքի մի կառույցի համար Սինանյանը դավաճան է, մնացածների համար՝ օտար։ Էլ չեմ խոսում, որ նա ժամանակին Հայաստանից արտագաղթել է ԱՄՆ, իսկ հիմա վերադառնում է այն ժամանակ, երբ իրեն բարձր պաշտոնի են նշանակում, ու բոլորն էլ հասկանում են, որ հենց նրան գործից հանեն, նորից կգնա ԱՄՆ։ Սա է պատճառը, որ Փաշինյանը հազիվ մի հարյուր հոգի գտավ, որ գան Հայաստան, այն էլ պայման դրեցին, որ կգան միայն երբ պետական կառավարման համակարգում գործի անցնեն, իրենք ինչո՞վ են պակաս Զարեհ Սինանյանից։ Այսինքն այժմ մեզանում գործում է Արի տուն ծրագրի նենգափոխված ու խայտառակ ձեը՝ Արի խոպան ։ Անկախ նրանից հանձնակատար կլինի, թե նախարար, նա պետք է ծնված ու ապրած լինի Հայաստանում, նա պետք է իր վրա կրած լինի մեր երկրի բոլոր դժվարություններն ու, այդուհանդերձ, հավատ ունենա, որ մեր երկիրն ունի պայծառ ապագա, որ ոչ մի պարագայում չի կարելի գնալ մեր Ավետյաց երկրից, ինչ դժվարություն էլ ուզում է լինի։ Թե չէ այնպես, ինչպես Փաշինյանը վարկաբեկեց ներգաղթը, նրա ոչ հակառակորդ չէր կարող անել։ Արի Հայաստան․ այստեղ պաշտոնյաները լավ են ապրում, մի նայի երկրի վիճակին, դա քո հետ կապ չունի, տնտեսական անկում լինի, համավարակ լինի, անգամ պատերազմ, դու քո աշխատավարձն էլ կստանաս, պարգևավճարներն էլ։ Եվ, վերջապես, պետք չի գերագնահատել սփյուռքահայերի քանակը, ու այն որպես որակ պատկերացնել, յոթ միլիոնանոց սփյուռք ասելով պետք է հասկանանք, որ մեր երկրում 80-ից ավել կուսակցություններ ունենք ու մի քանի հազար հասարակական կազմակերպություններ, բայց դրանցից միայն մի քանիսն են ակտիվ ու իրական գործ են անում։ Այնպես էլ սփյուռքում է․ արդեն որերորդ սերունդն է ապրում, որ նրանցից շատերը վաղուց իրենց հայրենիքը համարում են իրենց բնակության երկիրը։ Ուրախ պիտի լինենք, եթե կարողանանք այն գաղափարին, որ Հայաստանը համայն հայության հայրենիքն է, միս ու արյուն հաղորդել, որ գոնե դրանով սփյուռքի մեր հայրենակիցներին կապենք մեր երկրի հետ, բայց դա էլ չի արվում։ Բավական է, դրսից մեկը քննադատական խոսք հնչեցնի Հայաստանի որևէ արատավոր երևույթի կապակցությամբ, մեզ մոտ ասում են՝ գնա քո գործերով զբաղվի, եթե ուզում ես այստեղ լավ լինի, արի այստեղ ապրի։ Մարգարիտա Սիմոնյանը, ու ամուսինն էլ են հայ, իսկ նրա հայրը հայ պատմական ֆիլմի ռեժիսոր, անվանի հայ, բայց դա չի խանգարում, որ Մարգարիտա Սիմոնյանն ասի, որ նրա հայրենիքը ՌԴ-ն է ու ինքը պաշտպանում է այդ երկրի շահերը, իսկ եթե դրանք հակասում են Հայաստանի օրվա իշխանության շահերին, ապա նա կոշտ քննադատության է ենթարկում Հայաստանի իշխանություններին։ Այս քննարկման թեման չէ, վերլուծել Մարգարիտա Սիմոնյանը ճի՞շտ էր, թե՞ սխալ, ուղղակի յոթ միլիոն սփյուռքահայ, որ հաշվում ենք, նրան էլ ենք դրա մեջ հաշվում։ Ու եթե այսպես մի քիչ էլ շարունակվի, մեր երկրի համար սփյուռքի հանձնակատարի ինստիտուտն էլ կդառնա անիմաստ ճոխություն՝ ներգաղթող չկա, սփյուռքի գաղթօջախների հետ էլ արդյունավետ շփում չկա։ Ավելի լավ է դրա փոխարեն ստեղծվի արտագաղթի նախարարություն, քանի որ հենց սահմանները բացվեն տեղի է ունենալու հախուռն արտագաղթ, ավելի ճիշտ փախուստ, գոնե կարողանանք պետական մակարդակով կանոնակարգել մեր հայրենակիցների փախուստը։ Վռամ Սուքիասյան


Latest News
Hashtags:   

Փաշինյանը

 | 

շարունակում

 | 

վարկաբեկել

 | 

ներգաղթի

 | 

գաղափարը

 | 

ինչո՞ւ

 | 

ազատվեցին

 | 

Սփյուռքի

 | 

հանձնակատարի

 | 

գրասենյակի

 | 

աշխատակիցները

 | 

Sources