Thursday 6 August 2020
Home      All news      Contact us      English
azatutyun - 1 month ago

Վարչապետը չբացառեց, որ արտակարգ դրությունը կերկարաձգվի ևս մեկ ամսով

Հայաստանում կորոնավիրուսով վարակվածության ցուցանիշը մոտենում է 30 հազարին։ Նախորդ օրը հիվանդությունից 7 մարդ է մահացել։ Պարետատան նիստին հաջորդած ճեպազրույցում առողջապահության նախարար Արսեն Թորոսյանը հայտնեց՝ շաբաթ-կիրակի օրերին վարակվածության շուրջ հազար դեպք է գրանցվել։ «Հարաբերականորեն բարվոք է իրավիճակը տանը սպասող մեր քաղաքացիների մասով, այսինքն փաստացի ժամի 3-ի դրությամբ չունենք որևէ քաղաքացի, որն ունի հրատապ հոսպիտալիզացիայի կարիք, բայց հոսպիտալացված չէ», - ասաց նախարարը: Վերակենդանացման բաժանմունքներում մահճակալները զբաղված են, էական տեղաշարժ չկա, ասաց նախարարը։ Ծայրահեղ ծանր է 650 հոգի, թոքերի արհեստական շնչառության սարքերին միացված է 47 հոգի. - «Հագեցվածությունը, զբաղվածությունը այս մահճակալային ֆոնդի կրկին մնում է բարձր, հատկապես բարձր է մնում վերակենդանացման բաժանմունքների զբաղվածությունը: Ես հիմա տոկոս չեմ ուզում հայտնել, որովհետև միշտ նշում եմ, որ եթե նույնիսկ հիմա ունենք մի քանի մահճակալ ազատ տարբեր ռեանիմացիաներում, շատ արագ կամ դուրս են գրվում պացիենտները, կամ շատ արագ դրանք զբաղեցվում են, հետևաբար այդ առումով որևէ էական տեղաշարժ չկա»: «Այն պահից, երբ տեսնենք առողջապահական համակարգն ի վիճակի չէ այսպիսի ծայրահեղ լարվածության պայմաններում սպասարկել քաղաքացիներին, այլ ելք չի մնա, քան վերադառնալ խիստ սահմանափակումներին», - հայտարարեց վարչապետ Նիկոլ Փաշինյանը. - «Ավելի խիստ սահմանափակումներ կիրառել այս վիճակը հաղթահարելու համար: Այնպես որ, ես կարծում եմ, ընդ որում իմանալով, որ սա մեծ հարված է լինելու մեր տնտեսությանը, իմ հույսն այն է, որ մենք այնուամենայնիվ կգիտակցենք իրավիճակի լրջությունը, և մեր անհատական վարքագծի փոփոխությունը կլինի այն գործիքը, որով մենք կհաղթահարենք այս համաճարակը»: Վարչապետը չբացառեց, որ արտակարգ դրությունը կերկարաձգվի ևս մեկ ամսով։ Ըստ վարչապետի համաճարակի ամենամեծ խնդիրն անորոշությունն է. - «Ըստ ամենայնի, եթե ամեն ինչ այսպես գնա, առնվազն հիմա արտակարգ դրությունը մենք կերկարացնենք, բայց նաև արտակարգ իրավիճակների մասին օրենսդրությունը կփորձենք կատարելագործել այնպես, որ կարողանանք արտակարգ դրության ռեժիմի վերացման պայմաններում գործիքներ ունենալ արտակարգ իրավիճակների ռեժիմում որոշակի հակահամաճարակային քաղականություն վարել: Այո, մենք էլ քննարկում ենք, որ չենք կարող անընդհատ արտակարգ դրությունը երկարացնել, դա խնդիր է բոլոր առումով, բոլորիս համար խնդիր է, բայց մյուս կողմից չենք կարող համաճարակային իրավիճակը հաշվի չառնել, այնպես որ այստեղ մենք կփորձենք գալ հնարավորինս բալանսավորված լուծումների: Մենք ասում ենք այսօր շատ թե քիչ հարաբերականորեն կայուն է իրավիճակը, բայց ոչ մեկը չի կարող երաշխավորել, որ վաղը այդ իրավիճակը գլխիվայր կպտտվի: Մենք ամեն օր լարվածությամբ սպասում ենք գիշերվա ժամը 12-ին, տեսնենք քանի դեպք է արձանագրվում: Ցավոք սրտի, չկա երաշխիք, հենց այդ է, որ չկա երաշխիք, որ մենք մի իքս պահի չենք ունենա օրական 800, 900, հազար դեպք»: Վերջին մեկուկես ամսվա վիճակագրությունը ցույց է տալիս, որ կորոնավիրուսի տարածման հիմնական կենտրոնները բակերն են, ասաց Նիկոլ Փաշինյանը կրկին հորդորելով հետևել հակահամաճարակային կանոններին. - «Միջազգայնորեն ապացուցված փաստ է, և մենք այսօր կարող ենք վստահ ասել, որ դիմակների որակյալ կրումով, սոցիալական հեռավորությամբ և ձեռքերի պարբերական ախտահանումով մենք կարող ենք այս իրավիճակը հաղթահարել»:


Latest News
Hashtags:   

Վարչապետը

 | 

չբացառեց

 | 

արտակարգ

 | 

դրությունը

 | 

կերկարաձգվի

 | 

ամսով

 | 
Most Popular (6 hours)

Most Popular (24 hours)

Most Popular (a week)

Sources